Gula 91
“Kun tinud-on mo man gani ang pagpanguyab niya, ayaw gyud siya pasakiti, Erik. Hinuon, tun-i ang imong kaugalingon paghigugma kaniya.”
“Mora’g lisod higugmaon si Almina alang nako. Big turn-off para nako ang iyang pagka-flirt. Hilasan ko. Kun manguyab man ko niya, kana tungod kay gusto kong ipakita nimo nga andam kong magsakripisyo alang sa atong panaghigala. Di ko gustong magsamok pa si Almina nimo.”
“D-daghang salamat, Erik. Ug panghinaoton ko nga sa kadugayan makakat-on ka sa paghigugma kang Almina ug magmalipayon ka sa inyong relasyon.”
Human sa panagsulti nila ni Erik, misulod si Angeline sa iyang lawak. Didto gipahungaw niya ang naghuot sa iyang dughan pinaagi sa paghilak. Natay-og ang iyang abaga sa sagunson nga pagbakho.
Hingpit na gyung nahanaw ang iyang paglaom nga maangkon ang gugma ni Erik. Si Almina na gyud maoy makatag-iya sa gugma niini! Gisakitan siya!
Adlaw’ng Sabado, mipauli si Angeline sa lungsod sa Danao. Nalipay ang iyang mga ginikanan ug igsuon sa iyang pag-abot. -- Sumpayan pa