Gula 61
“Ambot kun wa ba kaha ko masayop, Yuri,” ni Salie pa. “Apan mao dayon kini ang misantop sa akong hunahuna sa pagkadawat ko niana.”
“Unsa ang nahinumdoman mo?” ni Yuri.
“Ang patay’ng lawas ni Debbie Balatan nga among nakaplagan didto sa bakanteng lote.”
“Unsa?”
“Nahinumdom ko nga sa ibabaw sa patay’ng lawas sa maong biktima may gibutang nga barahang queen nga heart ang buwak. Ug kanang mensahe nga akong nadawat nga hinimo sa mga cut out letters nag-ingon nga Ikaw Ang Rayna Sa Akong Kasingkasing. Sa ato pa, queen of heart. Dili ba katahapan nga ang misteryosong kriminal ang nagpadala niana?”
Nahilom si Yuri. Naghinuktok kini sa giluwatang pamahayag ni Salie.
“Husto ka, Salie,” mitingog si Yuri pagkilab sa pipila ka daklit. “Malagmit nga husto kanang imong analysis bahin sa sender nianang envelope nga imong nadawat.”
Si Salie mitug-an kang Yuri nga siya nagtuo nga ang misteryosong tawo aduna pay sunod biktimahon. Naghinuktok ang ulitawo sa gipadayag niyang pangagpas.
“Posible ka na,” miuyon si Yuri. “Apan ang wala nako hisabti kun nganong ikaw ang iyang gitawgan ug karon gipadad-an na usab niining brown envelope?”
“Matud niya,” midali pagsumpay si Salie, “gusto siyang motabang aron mosikat ako isip usa ka reporter. Apan bahin niining envelope, wala akoy ideya.”
Nanghupaw si Yuri una namulong. “Kinsa gayod kaha kining tawhana? Ug unsa may iyang motibo sa pagpatay og tawo?”
Wala’y tubag. Mitidlom ang masig nila ka hunahuna ngadto sa halawom nga pagpalandong.
“Lisod gayod ang pag-ila sa kriminal,” matud ni Yuri pagkataudtaod. “Wa gani nato matino kun lalaki ba gayod ang killer.” -- Sumpayan pa