Gula 39
Nakadayeg si Angeline sa kaprangka ni Almina. Tiaw ba nga mikompisal man kini sa iyang atubangan nga dako kini’g gusto kang Erik?
Hinuon, bisan pag wala mopadayag sa pagtug-an si Almina kaniya mahitungod sa tinud-anay nga gibati niini ngadto kang Erik, si Angeline nasayod nang nakagusto gayod kini ngadto sa ulitawo.
Masabot ug maila kaayo kini pinaagi sa lihok ug sinultihan ni Almina nga dako gayod kini’g gusto kang Erik.
Pero siya kaha? Maila usab kaha sa iyang lihok ug sinultihan nga nahigugma siya kang Erik? Nakasabot kaha si Almina nga may gusto siya kang Erik?
Apan lahi ang gihimo ni Almina kay sa iyang gibuhat. Si Almina dayag nga nagpakita pinaagi sa lihok ug sinultihan nga nakagusto kini kang Erik. Samtang si Angeline naningkamot pagtago sa iyang gibati ngadto sa ulitawo.
“Nagkasinabot na ba kita, Angeline?” misukna si Almina niya.
Wala motubag si Angeline. Gitutokan niya si Almina.
“Kun nagtinguha ka nga magkarelasyon kamo si Erik,” ni Almina pa. “Ayaw na lang kana ipadayon tungod kay dili gyud ko makatugot nga maangkon siya sa laing babaye. Busa, likaye siya, Angeline.” -- Sumpayan pa