Daw sa matay-og ang kalawasan ni Amanda sa limbationg panaghamag nila ni Amaro. Bugtong ang tingog sa mga gangis lamang ang nisibaw sa halawom kagabhion sa lungsod sa Santa Filomena. Mga kapitoan ka kilometro gikan sa dakbayan. Dinhi niya gikahibalag si Amaro, ang batan-on ug ambongang kura sa parokya sa Santa Filomena. Nadani siya sa mga pulong niini ug sanglit nagkaproblema man siya sa iyang kaminyoon, mao nga wala siya’y laing kadangpan gawas sa maong pari nga sa wala’y igong balibad ang mihatag sa kinatibuk-ang pagsabot ug pag-amoma nga misangpot sa ilang kahimtang karon.
Doktora si Amanda ug Doktor usab ang iyang bana nga si Marco. Apan gumikan sa panaglain og baruganan ug pagkawalay pagsinabtanay, daw nalas-ay ang panagpuyo hangtud nga nidangop siya sa maong sulad sa pagpakasala.
Sa laing bahin, si Amaro buotan ug kugihan nga pagkapari. Gani, usa siya sa mga sinaligan sa obispo gumikan sa kalantip sa iyang hunahuna. Apan mas kusog ang bul-og sa tawhanong panginahanglan ug kahidlaw.
Duna siya’y gipangita nga mas halawom pa sa lawasnong kahinam. Gipangita niya ang kahulogan sa iyang kinabuhi. Ug si Amanda nga bisan pa man sa iyang kasamaran, ang nakahatag ning tanan ngadto kaniya. Ang hanyag nga lisud balibaran. Hangtud nga nia gisaw-an nila ang dugam-is sa ritwal sa gugmang gidili ug gikasilagan sa tanan.
Buntag. Nilanog sa tibuok parokya ang makalilisang taho. Dunay tulo ka mga lawas nga hikit-ang nagkadugo sa silong ning kumbento. Ang duha ila kang Amanda ug kang Marco ang laing usa nga nagtinga ang kang Padre Amaro. Gisakay siya sa ambulansiya ug dali nga gidala sa Ospital. Sa tambalanan, si Amaro giduaw sa iyang higala nga si Padre Giovani. Sa dayon nang kabugto sa gininhawa sa batan-ong pari nakapanglingo-lingo si Padre Giovani apan dili siya makahimo og pagbutyag sa ilang gipanagsultihan. Igo lang gilitok ni Padre Giovani kining mosunod:
“Ang Dios Amahan nga maloloy-on pinaagi sa kamatayon ug pagkabanhaw sa iyang Anak, nagpasig-uli sa kalibutan ngadto Kaniya ug mipadala nganhi kanato sa Espiritu Santo, aron pagpasaylo sa mga sala; pinaagi sa pag-alagad sa Simbahan, pasayloon unta ikaw sa Dios ug hatagan sa kalinaw. Ug ako nagapasaylo sa imong mga sala. Sa ngalan sa Amahan ug sa Anak ug sa Espiritu Santo. Amen.”
Gipiyong malinawon ni Amaro ang iyang mga mata. Samtang didto sa gawas padayong gihunong sa mga Beata ang ilang pagrosaryo aron himoong sumsoman ang dugoong hitabo sa silong ning Kumbento. (Katapusan)