Pareho nga luya kaayo sila si Narding ug Camela pagmata nila pagka buntag. Tagsa-tagsa sila nga naligo ug nanggawas aron mangita og makan-an.
Mideritso sila sa ticket office sa barko ug nagpa-refund unta, apan duna diay kaubang barko nga mobiyahe inigka-gabii paingon gihapon sa dakbayan sa Sugbo.
Nagpalit daan si Narding ug Camela og makaon nila sa paniudto ug mibalik sila sa lodging house aron makapahuway, apan inay makapahuway nagkumbati hinoon pag-usab human matintal sa usag-usa nga nagtupad sila paghigda.
Pagka hapon, sayo sila nga miadto sa pantalan kay nahadlok nga mahabilin na usab sa barko. Wala sila’y nahimo sa barko gawas sa pagkatulog kay teheras ra ang ilang giukopar.
Mitingog ang call alert sa cellphone ni Narding. Ang iyang maguwang nga si Gilbert ang nanawag.
“Dia koy mga dala nga daghang prutas brod, kadtong imong gitugon. Sige mas labing maayo nga imo ko nga sugaton kay para dili ko matagbaw pagpangita’g kasakyan,” ni Narding pa.
Tuod, midunggo sa Sugbo ang barko nga gisakyan nila ni Narding ug Camela. Nagpauwahi ra sila pagkanaug sa ubang pasahero nga naglumbaanay. “Tua ra, mao kana ang sakyanan ni Brod, kanang asul nga kotse,” gitudlo ni Narding ang awto.
Nanaug ang igsoon ni Narding. Milantaw kini sa barko ug giwara-warahan ni Narding sa iyang kamot samtang nagtupad sila si Camela.
Layo pa gani si Gilbert nga igsoon ni Narding nagngisi na kini samtang naglakaw paingon sa ilang nahimutangan. “Siya ang imong igsoon Narding? Si Gilbert?” nakapangutana si Camela.
Natingala si Narding nga nakaila si Camela kang Gilbert. “Maayong pag-abot brod. Uy, may kauban ka diay?”
Nagkatinutokay sila si Camela ug Gilbert. “Camela! Ikaw kini! Dugay na akong nagpangita kanimo. Wala ka ba sultihi sa imong mga ginikanan nga gibalik ko ikaw didto sa Davao apan giingnan ko nga ania ka na sa Sugbo.”
“Brod Narding siya si Camela ang gisugilon ko kanimo nga akong girlfriend sa Davao ug nahimong inahan sa akong anak. Sa unsa nga pagkahitaboa nga nagkauban kamo brod?” ni Gilbert.
Nagkatinutokay sila si Narding ug Camela. “Sa barko ra kami nagkaila brod. Sulagma kaayo nga nagkaila kami. Mas maayo hinoon nga nagkakita mo brod kay para mag-estoryahay mo’g maayo.”
Nagkabalik ang relasyon nila ni Gilbert ug Camela samtang gikalimtan na lang nila sa hingpit ni Camela ug Narding ang sulagma nila nga deyt. (Kataposan)