Gula 26
Dihang nagkatagbo ang ilang mga mata, misukol siya pagpakigtinutokay kang Almina. Alang niya, dili siya angay mahadlok kang Almina kay wala man siya’y sala nga nahimo ngadto niini.
Si Almina ang unang milunga sa pagtinutokay kaniya.
“Tana, Erik,” giagda ni Almina ang ulitawo. Mamalik na ta sa library.”
“Sige, Angeline,” ni Erik pa ngadto kang Angeline. “Magsulti lang ta sa sunod higayon, ha.”
Wala motingog si Angeline.
May isulti pa unta si Erik kaniya apan gibitad na kini ni Almina paingon sa gawas sa canteen.
Flirt gyud! Nakatuaw si Angeline sa hilom.
Nagsingabot ang Sandugo Festival. Bibo kaayo ang Dakbayan sa Tagbilaran. Matag gabii adunay tulumanon nga ipahigayon sa lain-laing venue sama sa Island City Mall Car Park, Plaza Rizal, Fort Area, Bohol Cultural Center ug uban pa. Daghang mga tawo magsuroysuroy sa siyudad matag gabii.
Usa niana ka gabii sila si Vera ug Angeline nagkasabot nga mamalit og sud-an sa Sky Is The Limit. -- Sumpayan pa