Nakita ni Josie ang duha ka sinilas nga pula diha sa daplin sa karsada pag-abli niya sa usa ka ka bintana sa tindahan nga iyang gibantayan. Nahibulong siya kun nganong nabiyaan ang maong mga sinilas. Bag-o pa man ang maong mga sinilas guma. Wa pay hilis. Wa say naputol nga strap.
Alas sayes ron sa buntag. Mingaw pa ang karsada. Panagsa pang mga sakyanan ang nangagi. May mga joggers ug hikers sab panagsang manglabay. Nakahukom siyang manaug aron kuhaon ang mga sinilas. Nilakang siya aron manaug sa tindahan.
Sari-sari store ang gibantayan ni Josie. May gidak-on nga kuwatro metros por tres metros. Usa ka dupa ang gilay-on ini gikan sa aseras. Nia nahimutang sa kasadpang habig sa espaltadong dalan nga ginganlan og Aganisia Stree sa baryo Curare ning dakbayan. Kapin kun kulang bayente metros ang gilapdon sa maong karsada. Daghang mamarking maudto ug sayong gabii sa masig ka daplin sa karsada. Kasagaran mga drayber og dyip depasaheroan nga mangaon sa mga karenderya buy-on sa tindahan. Usahay anhi magtsek-ap ang mga drayber sa sakyanan.
Tulo ka bulan pa lang nga nagserbisyo si Josie isip sinaligan sa tindahan. Ang tag-iya sa tindahan iyang ig-agaw nga si Delia nga dako ang pagkamaguwang niya sa edad. Minyo na si Delia ug duna nay anak lalaki nga diyes anyos. Si Richie iyang bana, usa ka clerk sa Bristol Forwarders. Ilang anak si Terence, nagtungha og grade three sa Curare Elementary School. Way trabaho si Delia. Siya lang ang nag-atiman sa ilang panimalay nga nahimutang mga diyes metros luyo sa tindahan. Anha lang tigkatulgan si Josie sa tindahan aron sayo siyang kapangabli.
Nakahuman na og hayskul si Josie. Nihangyo siyas iyang ig-agaw nga mopuyo sa ila aron may higayon makaeskuyla siya’g kolehiyo. Gusto siyang makahuman og kursong Accountancy. Bugtong siyang anak. Iyang mga ginikanan nahibilin sa ilang probinsiya sa lungsod sa Gairan. Mananagat iyang papa Delfin. Iyang mama Remedios ang tigbaligya sa kuhang isda. Nangambisyon siyang makatabang sa iyang mga ginikanan sa panahon nga matiguwang sila. Wa una siya mointra anang uyab-uyab. Daghan man untang nangulitawo niya.
Apan labing masugid gyud niyang admirer si Frampton nga silingan ug kababata niya. Nakauyon sab unta siya ni Frampton kay bright ug buotan. Schoolmate sila sa Gairan National High School. Apan di gyud una siya makigrelasyon og lalaki kun di siya kahuman og kurso. Istorbo lang sa iyang pagtuon. Nisaad man si Delia nga gastohan siya sa pag-eskuyla magabii. Basta molihok lang siya sa tindahan ug panimalay isip miyembro sa pamilya.
Sa paglusad ni Josie sa karsada, gitag-an-tag-an niya ang hinungdan kun nganong nabiyaan ning sinilasa. Wa ba kaha gukda’g iro ang tag-iya. O wa ba kaha pareglahi’g mga hubog. Unya sa pagdinagan, nahibilin ang mga sinilas. Sa pagtikubo niJosie aron puniton ang mga sinilas, may dyip depasaheroan niurong sa atbang sa tindahan.
“Josie!” sa lalaki nga nanaug sa dyip. Nilabang sa karsada aron moduol ni Josie.
“Oy! Frampton. Ikaw man lagi? Gisundan diay ko nimo?” ni Josie nga nakapahiyom nga nakakita sa admirer.
“Wa oy. Pero gisusi ko lang kun hain ka nagpuyo sa siyudad. Nihunong mi ganihang sayong buntag tungod gyud sa tindahan. Apan sirado pa man. Gani nahibilin akong sinilas” ni Frampton nga maulawong niangkon nga iya ang mga sinilas.
“Ha? Imo diay ni?” ni Josie nga nagbitbit na sa mga sinilas.
“Lagi” sa ulitawo nga nangawot sa ulo.
“Nganong nabiyaan man ni nimo?” ni Josie nga nakuryoso pag-ayo. “Ah ah ah” nikanga si Frampton. Nagpanglingi sa drayber sa dyip nga nag-urong, naghuwat niya.
“Gikuha man god kong agaw Bebot nga konduktor. Kini laging wa ta maanad og sakay’g sakyanan. Gibilin nako sa yuta akong sinilas ganiha sa pagsakay nako sa dyip. Sa among balay god sa ato sa probinsiya, usa ra man ka ang-ang among balay. Naanad ko’g bilin og sanilas sa silong,” ni Frampton nga nanglipaghong.
“Promdi gyud diay ka. Nahala oy” ni Josie nga nitunol sa mga sinilas ngadto sa ulitawo.
“Salamat” ni Frampton sa pagdawat.
“Akong tuyo hiposon nako aron kun may mangita, akong ikahatag” dugang ni Josie.
“Sigi. Adto na ko kay mamasahero pa mi” sa ulitawo nga nagdagang nilabang sa karsada padulong sa dyip. Nakapanglingo nga nagpahiyom ang dalaga sa kaprobinsiyano sa iyang higala. (Katapusan)