Gula 14
Si Erik nadala gyud sa pagbitad ni Almina. Si Angeline ingon sa nahibulong sa iyang nasaksihan. Misantop sa iyang hunahuna nga tingalig girlfriend ni Erik si Almina.
Milabay ang usa ka bulan. Nagpadayon ang pagpakigsuod ni Erik kang Angeline. May mga higayon nga dapiton siya niini pagpangaon sa Sayas, Metro Centre, Prawn Farm, Pizza Hut ug uban pa.
Namatikdan ni Angeline nga samtang misamot ang kasuod nila ni Erik misamot usab paglambo ang iyang pagbati ngadto niini. Naseguro niyang gimahal na niya pag-ayo si Erik. Gikuyawan gani siya nga tingalig mamatikdan ni Erik nga nahigugma siya sa hilom ngadto niini.
Misantop sa hunahuna ni Angeline nga samtang kapugngan pa niya ang tanan, kinahanglan nga likayan na niya si Erik.
Adlaw’ng Lunes. Sayong misulod si Angeline sa unibersidad nga iyang gitunghaan. Duna siya’y gustong i-research mao nga paghisulod niya sa main lobby mideretso siya sa nahimutangan sa library.
Pagsulod ni Angeline sa library, maoy unang nasagap sa iyang panan-aw sila si Erik ug Almina nga nagsultihanay sa suok nga bahin sa basahanan. -- Sumpayan pa