Gula 98
Milagaak ang katawa ni Brandon nga ingon sa bag-ong nalisoan sa pangisip.
“Demalas ka lang, Jeffrey,” ni Brandon pa. “Tinuod nga ako’y naglugos sa imong hinigugma. Ug abi mo, nindot kaayo siya. Unsaon nga hinay ka man kaayo’g lihok. Aw, ako hinuon ang nakaangkon sa iyang pagka-babaye.”
“Demonyo kang dako!” Singgit ni Jeffrey gikan sa sulod sa langob dungan ang pagpabuto sa armas niini.
Nagkadipo-dipo og pasalipod si Brandon. Gihanginhanginan na siya sa mga bala nga gibuga sa armas ni Jeffrey nga mipusil kaniya gikan sa sulod sa langob. Nagkapuliki siya’g likay sa nagpungasi nga mga bala.
“Taposon na nato kini, Jeffrey,” hagit ni Brandon. “Gawas diha sa imong gitagoan kay mag-anduhay kita.”
Gidawat ni Jeffrey ang iyang hagit. Migawas kini gikan sa gitagoan niini. Nahimuot pag-ayo si Brandon pagkakita niya kang Jeffrey.”
“Hungog ka, Jeffrey,” ni Brandon pa. “Mosunod ka karon sa imong hinigugma nga akong gipatay human nako lugosa!”
Pusilon na unta ni Brandon si Jeffrey sa dihang milanog ang tingog gikan sa iyang luyo nga nakapaigking kaniya. -- Sumpayan pa