Gawas nga nagbukot pag-ayo sa habol, gidaitlan pa gyud og unlan ni Danilo ang usa niya ka dunggan. Kay ang lain niyang dunggan iya man usab gipaod sa unlan nga maoy iyang giunlanan.
Dili man god siya buot nga makadungog sa kalangas nga gikan sa gawas, ilabi na ang gikan sa ilang silinganan. Alingugngugan man god kaayo siyang mamati niini. Ilabi na sa mga sonata nga gipatokar sa mga radyo sa ilang mga silingan. Nga pulos lang gyud mahitungod sa Pasko.
Samot pa gyud nga dili siya gustong makabati sa tingog sa mga mananaygon, nga lanog kaayong mipalaoy-laoy sa mga alawiton sa Pasko, diha sa mga kabalayan.
Langas naman god kaayo ang tibuok palibot, niadtong higayona. Kay bisperas naman lagi sa Pasko. Kadaghanan god sa mga tawo, magsadya gayud panahon sa Pasko. Alang god kanila, ang Pasko maoy panahon sa kalipay. Panahon sa kasadya. Kay mao kini ang kasumaran sa pagkatawo sa atong manunubos nga si Hesus. Ang mesiyas, nga maoy giilang hari sa tanang mga hari. Ug manunubos sa kalibutan.
Apan alang kang Danilo, ang Pasko walay bili. Ug dili gani kini angay nga handumon ug saulogon. Alang god kang Danilo, ang Pasko magdulot lamang kaniya’g kasakit ug mga kagul-anan. Kay matag abot god sa Pasko mahinumdom naman hinuon siya sa mapait nga kasinatian sa iyang kinabuhi,.
Panahon man god usab kadto sa Pasko, sa dihang gibiyaan si Danilo sa iyang asawa, nga si Juby. Ug ang labing mapait, kay sa pagbiya kaniya sa iyang asawa, gidala man niini ang ilang bugtong anak. Nga gamay pa kaayo niadtong higayona. Mga lima palang gani kini ka buwan.
Iya man sab god napadapatan sa iyang mga kamot si Juby, atubangan gayud sa iyang mga barkada. Nasuko man god si Danilo kay gipugngan man siya ni Juby, dihang mokuyog unta siya sa iyang mga barkada sa pagpanaygon, ngadto sa laing kabalayan.
Dili man god mosugot si Juby nga molakaw pa si Danilo niadtong higayona, kay huhog naman kini kaayo. Maglisod naman gani kini paglakaw og tarong. Ubay-ubay naman god ang nainom nila ni Danilo diha sa ilang balay.
Nanag-inom man god sila si Danilo ug ang iyang mga barkada diha sa ilang balay. Lami man god kaayo sila’g sumsoman niadtong higayona. Kay nag-ihaw man gyud si Danilo og iro. Ug nagpalit sab og daghang mga ilimnong makahubog. Maong nahubog pag-ayo si Danilo. Hasta pa gani ang uban niyang mga kaubanan.
Sukad lang motalikod si Juby, nag-inusara nalang kanunay si Danilo diha sa ila.Ug nagmingaw nalang kanunay ang ilang panimalay. Bisan pa gani sa panahon sa Pasko.
Sukad lang niadto, nausab na ang pagtan-aw ni Danilo sa Pasko. Alang kaniya, ang Pasko dili na mao ang panahon sa kalipay. Kun dili mao kini ang panahon kun adlaw sa iyang mga kasakit. Kay siguro man god nga maguol siya si Danilo, inig-abot na sa Pasko. (Kataposan)