Dear Tita Salie,
Tawga lang ko sa pangalan nga Analie, usa ka minyo. Malipayon ko sa akong kaminyoon kay buotan ug responsable man ang akong bana, gawas niining usa ka butang nga makahasol kanako ug usahay mamahimong akong suliran.
Sa una man gud duna ko’y uyab nga Amerikano. Apan sa una ra kadto karon wala na kami. Nilanat sa duha ka tuig ang among relasyon, apan tungod kay dili man gayod kami alang sa usa’g-usa nagkabuwag mi ug naminyo ko niining akong nabana karon.
Ang akong problema, Tita, kay sa panahon nga mag-away mi kanunay niyang ibalik-balik ang mahitungod sa Amerikano. Mao nga modako gayod ang among away. Usahay kun wala mi mag-away iya ko sugsugon mahitungod gihapon sa maong tawo nga wala nako kahibalo kun asa o naunsa na siya, ug mag-away na usab kami.
Bisan kun ingon lang kini niini ka gamay, Tita, apan gikapoyan na ko niya. Unsa may angay nakong buhaton nga mohunong na siya sa iyang pagbalik-balik sa maong isyu? Palihog pasabta ko. Thank you, Tita and more power.
* * *
Maayong adlaw kanimo Analie ug kumosta ang imong kinabuhi? Tinuod gayod kana nga dili ta ganahan kun ang estorya sa atong kinabuhi balik-balikon pa bisan kun ato na kining gilubong sa kalimot. Dili na kita ganahan maminaw ilabi na kun kini dili na makaayo sa atong pagpuyo. Apan dunay matang sa tawo nga hilig usab muongkat sa mga nangagi ilabi na kun siya may kasuko sa tawo, iyang ibalik ang mga dugay nang nahitabo. Iyang hinumdoman ang mga panghitabo nga makapadugang sa kasuko.
Apan ako nagtuo nga wala’y suliran nga wala’y kasulbaran. Ang tanan dunay kataposan. Ang iyang problema gamay ra kaayo aron maguba ang inyong gitukod nga pamilya. Dili kana igong rason nga matumpag ang pamilya nga gitukod sa duha ka kasingkasing nga puno sa gugma.
Pangita og maayong higayon, Analie, nga imo kining ma-open ngadto sa imong bana ang isyu kabahin sa Amerikano. Pangita’g higayon kanang bugnaw ka og ulo ug mao usab siya aron maminaw siya kanimo. Kanang panahon nga malipayon kamong duha ug open sa usa’g-usa. Imo siyang hangyoon pinaagi sa paraygon nga tingog nga kun puyde lang dili na niya balikon pa ang isyu sa Amerikano kay nahuman na kadto ug dili sad makaayo sa inyong pagpuyo kun magsige pa siya og hinumdom sa mga nangagi kanimo. -- Tita Salie