Gula 85
Buot niyang mabawi si Danica gikan sa lalaki nga kauban niini. Dili gyud niya buhion ang maong lalaki sa higayon nga mahulog kini sa iyang mga kamot.
“Danica!!!” Mapungtanong singgit ni Randy dungan ang pagpabuto sa iyang armas.
Nalantawan na nila ni Col. Vince Noot ang atop sa payag sa dihang nakabati sila og mga butobuto. Sagol dagan ang pagtungas sa koronel sa bakilid. Misunod kaniya ang mga sakop niyang polis ug ang mga sakop sa Carcar PNP nga mi-back-up kanila.
Nakita niya nga mihunong sa pagpabuto si Randy Unson sa dihang gihunghongan kini sa usa sa mga sakop niini nga nakakita sa ilang pagsingabot. Ingon sa wala makugang si Randy sa pagkakita niini kanila. Wala na gyu’y kurat kining tawhana. Gipaabot niini nga mahiduol sila si Col. Noot.
“Maayo kay miabot kamo sa tukmang oras, Col. Noot,” nagkanayon si Randy. “Tabangi mi ninyo nga makuha ang akong pangasaw-onon nga gi-hostage sa usa ka lalaking armado.”
“Ayaw na lang pagpakaaron-ingnon pa, Randy Unson,” nagkanayon ang koronel. “Nabisto na namo ang matuod mong pagkatawo. Nia kami aron sa pagdakop kanimo sa kasong murder ug drug trafficking.”
“Wala ako makasabot nianang imong gipanulti, Col. Noot,” ni Randy.-- Sumpayan pa