Nasayod ko. Mao man gani nga nagpasalamat ko nga imo kong gigakos tungod kay kun wa mo pa kadto buhata, hayan dili mohuwas ang akong takig.”
Wala na motingog si Jeffrey. Unya mipadayon na sila paglakaw paingon ngadto sa payag.
Paglabay sa usa ka semana nahurot ang pinalit ni Jeffrey nga mga delatang pagkaon ug bugas. Kinahanglang molugsong siya sa lungsod aron mamalit. Nakahukom siyang ikuyog si Danica.
“Nasayod kong bored ka na dinhi,” nagkanayon si Jeffrey. “Wala ka maanad sa pagpuyo sa ingon niini kahilit nga dapit. Mao nga ikuyog ko ikaw ngadto sa lungsod aron ka usab makarelaks.”
“Dili na kaha delikado nga makita kita sa mga tawo nga nangita kanato?” Sukit ni Danica.
“Mag-amping lang ta. Nagtuo kong dili na kaayo init ang kapolisan sa ilang pagpangita nako. Nasayod ko sa dagan sa ilang utok tungod kay polis ko kaniadto. Ang angay lang natong bantayan mao ang grupo ni Randy Unson. Pero ikaw ang nakaila kaniya. Kun atua na unya kita sa lungsod, kinahanglang igmaton mo ang imong mga mata sa pagpaniid kun wala ba si Randy didto o ba kaha si bisan kinsang sakop niya nga imong nailhan.”
“Pipila lang ang akong nailhan sa iyang mga sakop.” -- Sumpayan pa