Nakautang siya’g kinabuhi. Gibugtoan niya sa gininhawa ang buaya sa ilang dapit. Nasayod siyang sala ang iyang gibuhat. Apan niadtong higayona nalimot siya sa kahayag. Gipahamtangan niya ang tawo nga midaugdaog sa iyang kaliwat. Giduhigan niya sa kagawon nga dugo ang iyang mga kamot.
Mitahan siya sa balaod human mahimo ang maong salaod. Gibanlod siya sa kalibotan sa mga patay’ng buhi. Luyo sa pag-od nga rehas wala niya basoli ang iyang gibuhat. Alang kaniya, dili angay mahayan ang pag-ibot sa daotang sagbot. Apan may kasubo nga namasuni sa iyang dughan. Nahilayo siya sa iyang banay. Wala siya’y gahom pagwakli sa kamingaw nga migakos kaniya. Kamingaw nga misangko sa kaluoy. Naluoy siya kang Lucia, ang pinangga niyang asawa. Nagbinugtong na lang kini sa pag-atiman sa ilang anak nga masuso pa.
May mga gabii nga nagtungok siya sulod sa selda. May mga higayon nga dili kapugngan ang pagdahili sa iyang mga luha. Laay puy-an ang bilanggoan. Kanunay mosungag sa iyang hunahuna ang paghandom sa iyang asawa ug anak.
Sulod sa atob daghan siya’g nakat-onan. Nakita niya ang pikas nga nawong sa kinabuhi. Luyo sa rehas nga puthaw sama sila sa mga alak nga gibaligya sa tindahan ni Iya Sidra nga ilang silingan. Ang isog dali rang mahalin. Busa nakakat-on siya sa pagpailob ug pagpasaylo.
Misagop siya sa mga pagtulon-an nga giwali sa mga pundok nga relehiyoso nga mibisita sa bilanggoan. Nahimo niyang naandan ang pagbasa sa Bibliya ug ubang mga basahon sa kaalam. Wala siya kawad-i’g paglaom bisan sa iyang kahimtang. May pagbati siya nga mosubang pagbalik ang adlaw inig labay na sa bagtok nga kagabhion sa iyang kinabuhi. Apan siya mismo wala masayod kun kanus-a moabot ang kahayag. Bilanggo sa tibuok kinabuhi ang silot alang kaniya. -- Sumpayan pa