Ang Kaluha

Gula 2

Nahinumdom si Rey nga dihang na-rescue nila kadtong usa ka gwapa nga babaye gikan sa kasa, iya gani kini nga gi-amiga ug niadtong higayona nabihag dayon ang iyang pagbati sa dalaga.

Gilingi pagbalik ni Rey sa iyang paghanduraw ang maong dugay-dugay na nga panghitabo. Hangtud nga misantup g’yud sa iyang huna-huna. “Tuod, nahinumdom na ko, Maricris ang ngalan adtong babaye nga sama g’yud nimo’g panagway!”

“Daan pa lagi ko nga ang ako g’yud nga kaluha ang imong nakit-an. Asa na man siya karon? Dugay na mi nga nangita kaniya kay wala na mi makadungog sukad sa pagbiya niya dinhi sa Dumaguete,” matud sa babaye.

Daw kalit lang nga nalunhaw ang nagkalaya na unta nga pagbati ni Rey ngadto kang Maricris. Karon inanay nga nanalingsing ang iyang pagbati apan ngadto na sa kaluha ni Maricris.

“Rey diay ang akong ngalan, news reporter ko ug may adtoon ko sa lungsod sa Siaton nga agta kuno nga nagpakita,” nagpaila si Rey sa dalaga dungan sa pagtug-an nganong napadpad siya sa Dumaguete.

Mipahiyom ang dalaga nga nagtan-aw kang Rey. “Ako si Maricar. Pareho g’yud mi’g nawong ang akong kaluha no?”

“Wala ka masayop. Pulos g’yud mo mga gwapa,” dali nga tubag ni Rey samtang wala niya buhii ang kamot ni Maricar. “Wala ko makatultol sa Siaton, pwede ba Mar ug dili ka lang motrabaho aron ubanan ko nimo didto?” ni Rey pa.

Gipasabot ni Rey si Maricar nga mapasayon ang iyang pag-adto sa Siaton, usa ka lungsod sa Negros Oriental, kun kauban niya ang dalaga. “Ugma na lang kay day-off nako,” sugyot ni Maricar.

Nangita og baratohong apartment si Rey aron adto siya matulog inigka-gabii. Pagka hapon, gibalik niya si Maricar sa kan-anan nga gitrabahoan niini. “Pwede ba ako nga makigpanuroy nimo unyang gabii diha sa daplin sa dagat? Kana ba nga gitawag ninyo og Boulevard?” gihangyo ni Rey ang dalaga.

“Sure. Amiga ka gud sa akong kaluha…. Dili ko ikaw balibaran kay wala ka ra ba’y kaila dinhi sa Dumaguete,” matud ni Maricar. Nasabtan ni Rey nga gaan usab kaayo’g tinagdan si Maricar kaniya. Inanay na g’yud nga misubol ang gugma niya kang Maricar.

Sa Boulevard. “Kanindot diay dinhi suroyan panahon sa gabii Mar no? Giswerte ko sa pag-anhi sa Negros kay nahimamat ko ikaw taliwala sa akong pag-inusara,” giingnan ni Rey si Maricar.

“Balaknon ka man diay Rey,” ni Maricar pa nga nagpahiyom. (Sumpayan)