GULA 6
Dinhi nakasabot si Colleen nga gihimo lang diay siyang instrumento ni Cody aron mahiduol kini sa iyang maguwang. Iyang nasuta nga wala diay makagusto si Cody kaniya kundili kang Alexa.
Hilom nga gisakitan si Colleen dihang iyang nasayran nga nagkahigugmaay na gayod sila si Cody ug Alexa. Apan wala gayod siya magpasabot ngadto sa iyang maguwang ug ingon man ngadto kang Cody sa iyang gibati. Gipaningkamotan niya nga matago ang hilom niyang kaguol sa naumol nga relasyon tali sa iyang maguwang ug ni Cody.
Sa matag higayon nga mamisita si Cody kang Alexa, dili gayod kalikayan ni Colleen nga mobati og pangabubho. Apan gipaningkamotan niyang dili siya hisabtan sa iyang maguwang ug sa hinigugma niini. Mauwaw siya. Gawas pa, dili siya buot nga mangilog sa kalipay sa iyang maguwang.
Human makakaon, gidali ni Collen pagpanghipos ang iyang kinan-an. Nanipilyo siya ug pagkahuman mibalik sa iyang kuwarto. Gilikayan niya ang pagtan-aw ngadto nila ni Alexa ug Cody nga iyang nalabyan diha sa sala.
Paghisulod niya sa iyang kuwarto, iyang naabtan nga nagsiga ang iyang cellphone nga gipatong sa ibabaw sa lamesita duol sa iyang higdaanan. Midali siya pagduol sa nahimutangan niini aron pagsusi. Nagtuo siya nga may nagpadala og text message kaniya.
Wala gayod masayop si Colleen. May nagpadala og text message kaniya. Si Brendan. Iyang gibasa ang text sa ulitawo.
“Luvin u s more than just a drim come true bcoz everything that I can do s out of luvin u,” nagkanayon ang text ni Brendan. -- Sumpayan pa