Nakamata si Rudy sa iyang gihigdaan. Kay niuyog ang iyang lawak. "Naglinog man tingale!" tuaw niya sa hilom. Gikulbaan siya. Gitan-aw niya iyang relo sa walang pulso. Untop alas dos sa kaadlawon.
Nakahunahuna siya sa pagbangon aron andamon niya iyang mga butang. Kay basig mokusog ang uyog ug kinahanglang mogawas sa balay. Nitimbakuwas siya.Unya nilabad iyang ulo. Ug nalipong siya. Husto! Nakahinumdom na siya. Pwerte niyang huboga sa niaging gabii. Grabeng inom nila sa iyang mga barkada. Wa gani siya kamatngon kun kinsa ning balay iyang gikatulgan.
Nibalik na lang siya’g higda. Gipaminaw na lang niya ang inuyog. Giliso niya iyang ulo ngadto sa ulohan sa kama. May dakong salamin sa walang ulohan sa kama. Sa ubos may lamesita. Ibabaw sa lamesita naa iyang bag nga itom. May folder sa tupad sa bag. Mao ray iyang mga butang ining iyang pagbiyahe.
Naglaraw siya nga kun mokusog gyud ang uyog nga morag matumba ang balay, puniton niya iyang bag ug folder ug modagan sa gawas. Total nagsul-ob man gihapon siyas iyang maong nga long pants. Ug t-shirt nga stripe nga asul. Wa man siya kahubo sa dayong pagkatulog. Tungod sa kahubog wa nay kalibutan. Wa gani niya mahubo iyang sapatos.
Nahinumdom siya nga ikaupat tong adlaw gahapon (ug katapusan sang adlaw) sa gitambungan niyang seminar. Gi-held ang maong Management Seminar sa Cafe Laguna sa Gaisano Ayala. Ug mopauli na unta siya sa Cagayan de Oro diin tua didto iyang opisina isip HRD Consultant. Apan naagni siya’s iyang mga kaklase ug barkadang dugay nang wa ikahugoyhugoy. Nikuyog siya’g panihapon sa Frank's Restobar nilang Erick, Dave, Chito ug Brendo. Sobra bayente anyos na silang wa nagkakita gikan sa paggradwar nila sa kolehiyo. Busa grabe ang hinangpanay. Ug estorya's mga kaagi. Over bottles of beer.
Si Rudy may duha ka anak puro lalaki. Puro na sab nakahuma’g kurso. Nangaminyo na. Si Dante ang kamaguwangan Architect. Si Dindo ang kamanghuran Civil Engineer. May duha na ka apo si Rudy. Nakita niya nga natiguwang na sab iyang mga barkada. May nangnipis na ang buhok. May naupaw. Ang iyang buhok daghan na’g uban. Apan wa nanglarot. Aron di makita ang mga uban, iya na lang gipamubo ang tupi niya. Daw semi opaw. Ala Derek Ramsay.
Naasawa niya si Gina nga iyang school mate sa Xavier University. Nakahuman si Gina og Accountancy. Ug nakapasar sa board exams pagka-CPA. Kasamtangang nagtudlo og subjects sa Accountancy si Gina sa ilang alma mater.
"Aftershock man kaha ni sa linog sa Japan!" tuaw ni Rudy sa hilom. Iyang gipanid-an ang inuyog. Mga diyes ngadto’s bayente minutos. Kini ang inuyog dapit sa iyang tiilan. Unya niurong. Pagkataudtaud sa iya na sang ulohan ang niuyog. Diyes ngadtos bayente minutos ang inuyog. Unya niurong.
May nasigpatan siyang gamay nga bintana sa sentro sa bongbong sa iyang lawak nahigdaan. Ini’g higayona nahanaw iyang lipong. Ug labad na lang sa ulo ang nagpabilin. Nipugos siya’g bangon. Niduol sa bintana. Iyang giablihan. Ug nakita niya sa kilid ining bilding iyang gihigdaan ang dagkong mga letra nga nagsiga sa neon lights. "KINGSWOOD MOTEL".
Dinhi diay sa motel siya gihatud sa iyang mga barkada. Ug wa na siyay kalibutan kay blackout na siya sa kahubog. Ug ang iyang lawak nias ikaupat nga andana sa motel. Nakapahiyom si Rudy sa iyang kahiamgo. Ug nakahukom nga mobalik na lang og katulog. (Katapusan)