Gula 49
Dihadiha nakasabot siya kun unsay gibuhat ni Mr. Waldon kaniya. Gipahimuslan ni Mr. Waldon ang iyang pagka babaye samtang wala pa siya’y panimuot. Ingon sa kalit lang midat-og kang Xenia ang tibuok kalibotan human niya naseguro nga nahulog sa mga kamot ni Mr. Waldon ang iyang pagka babaye. Giangkon siya niini sa daotan nga paagi!
Dihang nakamata na si Mr. Waldon, gipahungawan kini ni Xenia sa iyang kalagot. Gilayog niya ang lalaki. Gikawras niya sa iyang mga kuko ang lainlaing bahin sa lawas niini. Nagbahis pag-ayo si Xenia.
Nagkapuliki sa pagpanagang si Mr. Waldon sa pag-atake ni Xenia. Naghilak si Xenia nga nagpadayon sa pagpamukpok ug pagpangawras kang Mr. Waldon. Labihang lagota ni Xenia tungod sa gibuhat ni Mr. Waldon kaniya.
Dihang napikal na tingali si Mr. Waldon kay wala man gayod molunga si Xenia sa pagpangawras bisan giunsa niini’g badlong, gisumbag niini ang babaye. Maayong pagkaigo sa kuto-kuto ni Xenia ug daw dihay kaliboan ka mga bituon ug aninipot nga mililas sa iyang tinan-awan.
Gibati ni Xenia ang tumang kasakit sa pagsumbag ni Mr. Waldon kaniya. Mitikuskos siya ug nalup-og sa salog. Diriyot siya makuyapi. -- Sumpayan pa