Sige la’g patisoy, way uyab! Mao kining pulonga ang agad isugat ni Niro kaniya kong moabot na siya sa basketball court nga ilang estambayanan nga managbarkada.
Hilig man gud siyang magsul-ob og nindot nga sapot unya pina-style pa gyud pina-side view pagsul-ob ang kawo sa iyang ulo, magsul-ob og colored t-shirt sapawag tudlis-tudlis colored polo, magpurontong og short, magsapatos og pula sa wala og yellow sa tuo nga tiil.
"Maayo nang way uyab, Nir, kay daghan tag tsiks, makapan-tsiks tag daghan." Abtik nga tubag ni Diefre sa bugal-bugal ni Niro nga gipaagi lag komedya.
Kada hapon gyud silang mo-estambay dinhi, sugod sa alas-singko nga hingpit nang mobiya ang kainit sa adlaw ug mag-iyahay'g pamauli humag bagting sa kampana sa duol nga simbahan, ang oracion sa alas sais sa gabii nga pagabagtingon ni Brod. Yosbo.
Mingaw ang basketan panagsa ra naay mag-basketball. Dili sila moapil og duwa. Ganahan lang sila diri kay duol og dagat, makalanghap silag lab-as nga hangin samtang mangatawa sa ilang mga estorya nga kinomedya. Apan mao lagi, si Deifre, ang kanunay malumsan sa bugal-bugal kun bahin na's uyab-uyab ang ilang hisgutan. Mohilom na lang si Diefre ug magtext-text sa iyang 5110 cellphone. Hulbawan pud dayon siyang Ardi “si’g text-text, way uyab!"
Pulos ra taga-diri ang mga uyab sa barkada ni Diefre. Mga probinsyana apan tua pa karo'g syudad kay nangiskwelag college. Si Diefre ug iyang mga barkada nga si Niro, Aboy, Onil, ug Ardi pulos ra high school ilang nahuman.
Miabot na ang unang buwan sa bakasyon, malipayon kaayo ang mga barkada ni Diefre kay niabot na ilang mga uyab. Gikomedyahag samot si Diefre sa iyang mga barkada. Gisungog nga way uyab ug gipasuya pinaagi sa paghalok sa ilang mga uyab. Mikatawa lag hilaw si Diefre.
Sukad adto, wa na magpakita si Diefre sa iyang mga barkada.
"Bayot tingali to si Diefre, Bay, sa? Nakaingon si Niro samtang naghapu-hapuhap sa buhok sa iyang uyab nga naghigda sa iyang paa.
Tingali, basig na-S lang pod to, nasuya ba nga naa tay mga uyab, siya ray wala." Matud ni Ardi, nga naghigda-higda sa paa sa iyang uyab diha sa lingkoranan sa basketball court nga ilang estambayanan. Nangatawa sila. Bisag wala na si Diefre, gibugal-bugalan gihapon nila.
Human sa duha ka buwang summer vacation, nag-abot ang upat nga pulos subo ang panagway sa ilang estambayanan. Hilom. Tag-nilibo ang panampiling. Daw miuyon nila ang panahon. Midag-om ang langit. Mibawod ang dagat. Daw nag-wild ang mga pagatpat nga gihampak sa naghaguros nga hangin ug nanglupad ang mga dahon nga nangatangtang.
"Buanga mga Bay, gibuwagan ko sa akong uyab," mibuak sa kahilom si Niro.
"Ha! gibuwagan sab ka?" Halos magdungan sila si Aboy, Onil, ug Ardi.
"N-Ngano? gibuwagan sab diay, mo?" ni Niro nga natingala ug nagtinan-away sila.
"Nganong gibuwagan man ka, Niro?" Pangutana ni Aboy.
"Buntis siyag usa ka buwan ug si Diefre kuno ang amahan."
"Unsa???/ Pareha diay ta ini!!!" Nagdungan ang tulo, pagsulti. Lagot kaayo silang Diefre.(Katapusan)