Gula 84
Pasado alas onse na sa paghiuli ni Patrick. Nakugang kini dihang natukmaan siya niini nga naglingkod sa sopa sa sala.
“Wa ka pa diay matulog?” Sukit ni Patrick.
“Naghuwat ko nimo,” laktod nga tubag ni Urielle. “Nganong di man makontak ang imong cellphone?”
“Nag-lowbat ko.”
“Nanawag ko sa imong opisina pero wa ka didto. Sayo ka man kunong migawas. Diin ka man diay?”
“A, gi-invite ko sa usa ka higala nga mangaon sa gawas. Wa ko makabalibad. Suod man gud kaayo kami sukad pa kaniadto ug dugay na kaming wa magkita. Mao nga gibiyaan ko na lang ang akong mga bulohaton sa opisina tungod niya.”
Kuwang sa pagtuo si Urielle sa gisulti ni Patrick kaniya. Dili unta siya gustong magduda. Pero dili gayod siya kombinsido sa gisulti niini kaniya. Wala lang siya magpasabot nga nagduda siya ngadto niini.
“Sorry, ha,” ni Patrick pa,“nga nalangay ko.”
“Okey lang,” matud ni Urielle. “Pero sa sunod gani, pahibaw-a ko aron di ko mabalaka.”
“Unsa may imong kabalak-an? Di na man bitaw ko batang gamay?”
“Bisan na. I-ingon gayod tingali niini ang bation sa usa ka asawa.”-- Sumpayan pa