Gula 62
Takulahaw lang nahinumdom siya sa iyang mga ginikanan. Kaniadto tugob sa kadasig ang ilang pamilya sa buhi pa ang iyang mga ginikanan ug ang iyang manghod nga si Jerome. Hupong sa kalipay. Puno sa kinabuhi ang ilang panimalay. Dili sama karon nga nagmingaw na ug nagmulto ang kasubo. Laay!
Mitindog si Carlo ug mipaingon sa kanhing lawak sa iyang mga ginikanan. Paghitungod niya sa seradong pultahan, mihunong siya. Daw nawala siya sa kaugalingon samtang gitutokan ang palid sa pultahan. Nakapanghupaw siya. Apan pagkilab sa pipila ka daklit, nahibalik na kaniya ang kahiamgo. Gihinay niya pagliso ang seradora sa pultahan. Miigot ang bisagra nunot sa inanay nga pagkaabli sa pultahan. Mihinay si Carlo pagsulod sa lawak.
Tumang kahaw-ang ang miabi-abi kaniya sulod sa lawak. Mingaw. Walay timik ang palibot. Sa usa ka gamay nga lamesita, diha pa ang mga upos sa kandela nga ingon sa nahubsan na sa mga luha. Miginhawa siya’g lawom. Ug nakapanglingo siya. Gikurit na usab ang iyang dughan sa kasakit. Mipusnga ang iyang balatian.
Milingkod si Carlo sa ngilit sa katre. Dihay kabug-at nga kalit lang midat-og sa iyang kaugalingon. Nahanduraw niya ang iyang kaugalingon nga sama sa usa ka piso nga gibiyaan sa inahang himungaan taliwala sa halapad nga disyerto. Wala na siya’y igsoon. Wala nay mga ginikanan. Gibawi gikan kaniya ang iyang mga mahal sa kinabuhi sa tumang kamakalitan. Ang kamatayon daw tulisan nga midagit kanila.
Nakadawat na siya sa nahitabo ni Jerome. Nahatagan na og hustisya ang kamatayon sa iyang manghod. Apan maglisod pa siya pagdawat hangtod karon sa gidangatan sa iyang mga ginikanan. Wala gayod siya magdahom nga ingon niadto kakalit ang ilang pagtaliwan ug pagbiya kaniya. Ingon sa bangis ra kaayo ang kahigayonan. -- Sumpayan pa