Anino sa kulto

Gula 8

Unya, nakita ni Guieb nga mao nay gisubay sa kaaway ang fly over paingon sa Escolta. Gisundan gihapon niya kini. Namatikdan niya nga nagkakusog pa gayod ang pagdagan sa gisakyan sa kaaway. Giyatakan usab niya ang gasolinador sa awto nga iyang gimaneho.

Tulin kaayo silang milabang sa fly over. Mao na usay nakita ni Guieb nga tanos kaayong girumbo sa gisakyan sa kaaway ang Jones Bridge nga milabang sa Pasig River. Misunod gihapon si Guieb niini. Hilabihan na gayod kakusog ang pagdagan sa ilang mga sakyanan.

Sa paghimuntog sa awto nga gisakyan sa kaaway sa tungatunga sa tulay, kalit kining mihunong ug mibabag sa taliwala sa agianan. Si Guieb nga wala makabantay wala dayon makapreno. Midasmag ang awto nga iyang gisakyan nga milumpat, milupad ug midayib ngadto sa malang-og nga tubig sa suba sa Pasig. Miulbo ang hugaw nga tubig sa pagkahagsa sa awto.

Wala na masayod si Carlo Guieb sa sunod nga nahitabo kaniya.

Duha ka semana human sa engkuwentro sa Luneta. Buntag. Mahayag ang panahon. Ang kinaiyahan nagpakita’g kamalinawon. Nahigmata si Carlo Guieb nga gipukaw sa sagunson nga bagting sa telepono nga gipatong sa gamay’ng lamesita tupad sa kama nga iyang gihigdaan sulod sa lawak sa apartment nga iyang giabangan. Mao pa siya makaalinggat nga taudtaod na diay nga nakasubang ang adlaw. Taas na ang gintang niini didto sa sidlakan. Nakalapos na sa bildong bentana sa iyang lawak ang kainit niini nga milabaw sa nagsalipod nga tag-as nga mga bilding nga nanuyhakaw sa dakbayan sa Makati.

Nagpadayon ang telepono sa pagtawag sa pagtagad ni Carlo Guieb. Mihayang siya sa paghigda ug gikawhat ang awditibo. Mihunong kini pagbagting dihang iya nang gidala ngadto sa iyang dalunggan. -- Sumpayan pa