Gula 25
Bulan sa Oktubre dihang naminyo ang akong magulang lalaki. Wala pa siya makatapos sa iyang pagtuon sa kolehiyo. Kanunay man siyang makapalta sa pag-eskuyla tungod sa kawad-on sa among mga ginikanan.
Maka-eskuyla lang siya’g usa ka semester, makaundang na sab sa sunod nga semester. Mobalik na man pag-eskuyla inig-abot sa laing semester. Unya dili na sab makapadayon inigkatapos sa maong semester.
Sa kadugayan, ingon sa gibati’g kalaay ang akong maguwang sa on and off niyang pag-eskuyla. Maong nakadesidir siyang magminyo sa iyang uyab nga nagpuyo sa kanait nga barangay.
Sa pagkaminyo sa akong maguwang, ako na lang usa ang gisakop sa akong mga ginikanan. Nagpatukod man dayon og balay ang akong maguwang didto sa barangay nga maoy dapit nga pinuy-anan sa iyang asawa.
(Tulo kaming managsuon. Ang akong maguwang lalaki maoy kamagulangan namong tulo. Ang sunod niya nga usa ka babaye namatay sa sayong pangedaron dihang mihugpa ang epidemya sa suka ug kalibang sa among dapit.)
Kun naa ko sa balay, maka-masturbate ko bisan unsang orasa. Wala nay kasugawnan kay wala na man magpuyo sa balay ang akong maguwang nga maoy maniid sa akong kalihokan kaniadto sa wala pa siya naminyo.
May manghod ang asawa sa akong maguwang nga iyang gitupo-tupo nako. Pero wala koy kursonadang manguyab sa maong babaye kay wala ko makagusto niini. Subidahon sab kaayo’g dagway ang maong babaye.
Dihang second year high school na ako, akong gipangulitawhan pag-usab si Crisanta. Dili na kami klasmet. Siya nahisakop sa Section Sardonyx ug ako sa Section Amethyst. Nagdahom kong sugton na gyud ko ni Crisanta kay wala na man mi magkaklasmet.
“May paglaom na ba ang akong gugma, Cris?” Gipangutana ko siya. -- Sumpayan pa