Wala magdahom si Jody sa kadako sa oportunidad nga itanyag ni Mr. Enrique Salvador kaniya. Tiaw ba nga sa iyang kabag-o pa nga empleyado, siya nay general manager sa kompaniya nga gipanag-iya niini?
Gitugbangan niya’g kaligdong ug kamatinud-anon sa pagpangalagad ang pagsalig ni Mr. Salvador kaniya. Sa iyang paglingkod isip general manager sa kompaniya, nagpatuman siya’g mga kausaban. Mga kausaban nga labi pang nakatabang aron molambo pag-ayo ang kompaniya.
Nagustohan sa mga empleyado ang sistema sa iyang pagdumala. Hingpit na gayod nga gisalig ni Mr. Salvador kaniya ang pagdumala sa printing press. Mao nay giatiman niini ang gipanag-iya niining mga pawnshop ug fastfood outlet.
Nabatyagan ni Jody nga inanay na siyang nakabangon gikan sa iyang pagkapukan. Alang kaniya, milabay na ang trahedya nga midangat sa iyang kinabuhi. Dili na siya buot maghandom sa nangagi.
Apan may mga higayon gayod nga dili niya kalikayan ilabi na sa panahon nga maglingkod siya sa iyang talad-buhatan nga motikdol sa iyang kaisipan sila si Randy, Megan ug ang iyang amahan. Kumosta na kaha sila? -- Sumpayan pa