Gula 58
Wala makatutol si Ricky dihang gitaptapan nila og panyo ang iyang mga mata. Unya may migunit sa duha niya ka kamot ug gipalakaw siya. Wala madugay, gipasakay na siya sa usa ka sakyanan. Gikulbaan siyang namalandong sa iyang kahimtang.
Kadiyot ra ang pagdagan sa sakyanan. Nanganaog sila. Walay ideya si Ricky kun unsa nang dapita ang ilang naabtan. Apan nakaseguro siya nga dili pa kaayo layo gikan sa kinapusoran sa lungsod ang dapit.
Nanglakaw sila. Gitaptapan gihapon ang mga mata ni Ricky apan nakamatikod siya nga hagip-ot na ang dalan nga ilang gisubay. Wala madugay, ingon sa tungason na ang dalan nga ilang giagian. Mora’g padulong sa bukid!
Dangtan og dul-an sa duha ka oras nga paglakaw, mihunong sila. Gitangtangan na sa taptap ang mga mata ni Ricky. Maoy una niyang nakita ang armadong mga tawo nga nag-alirong atubangan sa usa ka daob. Ang usa niini miduol kanila.
“Ania na si Ricky Liwanag, Kumander,” nagkanayon ang usa sa unom ka lalaki nga maoy nagdala kaniya sa maong dapit.
“Maayong pag-abot, Ricky Liwanag,” nagkanayon si Kumander Abay.
“Kumosta ka, Manoy?” Matud sa tingog nga naggikan sa luyo ni Ricky. -- Sumpayan pa