Tungod ni Basyang

Nag-anam kakusog ang hangin ug ulan. Daghan na ang nangatumba nga saging. Nahapla na ang katayanan sa sikuwa ug paliya; ang mga tamatis, sili, ug talong nangapilay; apan ang makalilisang hagiyos sa hangin sa gawas ug sa ilang palibot, wala makahadlok sa magtiayong Ramon ug Rosing.

Daku ang ilang pagsalig nga ang bagyong Basyang dili makaunsa sa hollow blocks nga koral ug sa sementado nilang balay. Nagpabilin silang nag-atbang paglingkod sa sopa diha sa luag nilang lawak dawatanan. Kalmado kaayong nag-estoryahanay sa ilang kagahapon ug karon.

Si Ramon, anak og usa ka manananggot; samtang si Rosing, anak og tindera'g buwad sa Taboan. Tungod sa ilang paninguha, pulos sila nakatapus sa kolehiyo. Si Rosing, na' maestra; ug si Ramon, na'enhenyero. Naminyo sila ug nanganak og upat; duha ang lalake ug duha ang babaye. Ang tanan nakatapos sa kolehiyo ug nahimong: abogado, enhenyero, dentista ug nurse. Ang tulo nangaminyo na ug adunay maayong trabaho ug kaugalingong panimalay. Ang nurse nga maoy kamanghuran, dalaga pa, nagtrabaho sa Maryland USA. Siya maoy nagpadala sa suportang pinansiyal nga gikinahanglan nilang magtiayon matag bulan.

Ang linugapak sa gamay'ng sanga nga mitugpa sa ilang bintana, nakapahinumdom sa ila kanhing buhaton kun may pasidaan nga ilang madungog sa radio nga may umaabot nga bagyo. Maglumba dayon sila pa'g ngadto sa ilang eskuylahan aron makapuwesto dayon ug mag-rosaryo. Mag-ilogay sila aron maka-una sa linya, kun aduna nay ahensiya sa gobyerno nga manghatag og pinutos nga pagka-on ug mga daan nga sinina.

Ang mahinuklogong bahin sa ilang kabatan-on wala mahanaw sa ilang panumdoman. Naghatag kini kanunay og kinabuhi sa ilang tinguha, unsa-on pag-atubang ang hagit sa kalisud aron sila mabuhi nga malipayon.

Natugaw ang paghandom sa ilang kagahapon. Ilang nadungog ang usa ka singgit-pakitabang, gikan sa babaye nga diha sa pultahan sa ilang koral.

Wala kapugngi ni Ramon ang pagpanglugmaw sa iyang luha. Gikumot sa kalooy ang iyang kasingkasing, dihang iyang nakita ang tag-iya sa tingog nga nagkurog sa katugnaw. Siya si Salie, ang babaye nga una niyang naibgan ug napangulitawhan. Wala niya maangkon ang gugma niini. Giayran siya niini ug may kantalita pa nga dili gyud niya makalimtan. Angayan lang nga mag-iningon niadto si Salie kaniya, kay tubigtubigan ang iyang ginikanan ug may kaanyag sad siya nga giilogan sa mga maghahalad nga may ikasakbang sa iyang kahimtang ug pangandoy. Ang kantalita ni Salie; giisip ni Ramon nga usa ka hagit kun unsa-on niya paghaw-as ang iyang kakabus inay bugti-an ug pagdumot.

Gisugo ni Ramon si Rosing pinaagi sa salabtonong kidhat ug kibit sa ngabil nga pasudlon dayon si Salie aron dili kini kuyapan sa katugnaw kay sa iyang tan-aw morag masakiton ang panglawas.

Gipasulod ni Rosing si Salie sa ilang panimalay gi-abi-abi sa usa ka mainiton ug matinud-anon pagtagad ug kinasingkasing paghatag sa mga panginahanglan niini nga walay gipaabot nga balos.

Tungod sa bagyong Basyang nakita sa pulong ug buhat ang panumpa ni Ramon ug Rosing nga i-alagad sa Diyos ang nahabilin nilang kinabuhi. (Kataposan)