Hesusmariasep! Nakapanguros sa kahadlok, ang mga pasahero sa Bus."Oy, driver! Magpakamaty gani ka, ayaw mi i-among," singgit sa usa sa pasahero, nga kaganiha ra napungot. Mipadayon hinoon pagtulin, daw piloto nga mipalupad sa sakyanan.
Wa madugay, kalit kining nawad-an sa preno, nisigsag ang dinaganan ug didto nasampak sa kongkretong tulay ug dayong kahulog niini.
Taudtaud, nangabot na ang mga rescuer ug ambulansiya.
"Hala, ipakanaug dayon ang kahimanan sa ubos," sa team leader, “ug itaod nang mga gamit didto sa tulay."
Grabe ang maong aksidente. Kadaghanan patay o naangol nga nawad-an sa panimuot. Mikawas na ang ilang mga kalag aron mohapit kang senyor San Pedro.
"Oh linya mo, first come first served," ni Senyor. "Ikaw, dali diri, kinsa toy ngan nimo?" Gipakli ang dakung libro. "Wa man ka sa listahan pa, balik usa didto sa yuta." Giingnan niya kadtong tawo nga hinimbaya kaayo.
"Ako ang driver sa bus, talahurong Senyor." Iya nang turno.
"Excellent!" Abiba ni Senyor, dayong tunol niini sa, "isul-ob ning bisti nga bulawan. Adto ka anang balcony sa langit."
"Akoy sunod Senyor, usa ako ka politiko. Bag-o lang ko napildi sa tikas sa eleksyon."
"Mao ba? Atong tan-awon, kun nakalista naba ang imong ngan dinhi." Ni Senyor samtang gisuhid ang listahan. "Hala! Dia na, pero sa sunod buwan pa ang imong eskedyul, balik sa didto yuta."
"Senyor, pwede ba mohangyo," nagpakilooy intawon, “kun mahimo gusto ko untang i-uswag ang akong termino."
"Nganong di, kana lang. Apan magdepende ang tanan kun maayo ang imong mga binuhatan."
"Ako’y alagad nimo sa dugay nga panahon, talahurong Senyor."
"Maayo kun mao kana. Oh, dawata kining bisti nga puti. Adto ka anang langit nga ubos sa driver,” niya pa, "Oh! Mora ka ma’g wa malipay?
"Nyor, nganong bisting bulawan man ang gihatag mo sa driver?
"Kanay angay kaniya, nga tungod sa kakusog sa iyang dinaganan, mag-ampo ang mga pasahero, nga dili unta sila madisgrasya."
"May molabaw diay, nga kanunay man kong nagwali sa ebanghelyo?"
"Apan sa kadugay sa imong sermon, nangatulog na ang mga nanimba." (Kataposan)