Gula 1
Taudtaod nang nagpaatbang si Ronald Liwanag sa estasyon DyTM, ang sibyaanan nga gialagaran sa iyang maguwang nga si Ricky isip usa ka broadcast journalist. May tulomanon sa radyo matag gabii ang iyang Manoy Ricky ug on board pa kini karon sa announcers booth. Naghulat siya nga mogawas ang iyang maguwang sa maong estasyon sa radyo human sa programa niini kay may mahinungdanon silang panagsultihan. Kinahanglang mananghid siya’g tarong sa iyang maguwang.
Usa ka estudyante si Ronald sa usa sa mga tulonghaang kolehiyo sa Bohol. Naila siyang aktibista sa ilang eskuylahan. Aktibo siya sa mga kalihokan nga nagpadayag og pagsupak ug pagsuway sa dunot nga sistema sa gobiyerno. Makapila na siya mangulo sa pagmartsa sa kadalanan aron pagpadayag sa ilang sentimento sa panggobiyerno sa Pilipinas. Sa laktod, usa siya ka aktibong raliyista.
Gitan-aw ni Ronald ang relo diha sa iyang bukton. Hapit na ang alas onse sa kagabhion. Hapit na mogawas ang iyang maguwang gikan sa sibyaanan sa radyo kay untop alas onse man mahuman ang programa niini. Naghinamhinam siyang nagpaabot sa iyang Manoy Ricky. Apan gikulbaan usab siya’g diyotay samtang naghunahuna kun unsay mahimong reaksiyon sa iyang maguwang sa iyang isulti ngadto niini karon. -- Sumpayan pa