Dili gayod tiaw ang akong kahibulong nga sa matag abot ni Bador gikan nga namasol, moderetso man dayon kini og higda sa lantay aron matulog?
"Dor, nagbinag-o ka na man? Imbes motupad ka kanako sa paghigda, ingon sa maglikay ka na man hinuon?" sagol bagulbol ang tuno sa akong sinultihan.
"Sayang man god ... nga imbes kada adlaw ako maligo sa sapa nga dili kaayo halayo sa among balay, ingon sa maglikay na man hinuon kining akong bana? Ngano kaha?
Sa kabag-ohay god namong nanagtipon ni Bador, isip magtiayon ning awaaw nga dapit ning balangay sa Kiwkiw, nga sakop ning among lungsod sa San Fernando, makaingon man gyod ako sa akong kaugalingon nga basin adunay giiring-iringan kining akong bana nga mananagat, nga suki niya sa isda, sa panahon nga modunggo siya sa baybayon?
Puyra buyag lang sad god, bisan ingon na lang niini ang pangita sa akong bana, kaibganan man sad ang iyang hitsura?
Gumikan sa akong kahiubos ug kalagot ni Bador, wa na ganahi pa maligo. Unsay kapuslanan nga sa kamahal karon sa sabon nga humot, dili man gayod ganahan ang akong bana nga makigdulog kanako sa pagpanghigda?
Gisulayan ko nga sulod sa usa ka buwan, wa na ako maligo sa may sapa. Kasukaon ako nga makapanimaho sa panahon mangalisngaw ang daw baho sa patay'ng ilaga nga gikan sa akong bilahan.
Halawom kadto nga gabii ... sa adlaw'ng Sabado. Wa moadto ang akong bana sa dagat, gumikan sa balita sa radyo nga may umaabot nga bagyo.
Nagpatulog-tulog ako kunohay. Gipiyong ko ang duha ko ka mata. Diskarte ko kini basin motupad kanako sa paghigda si Bador.
"Ngano god intawon Bador ... nga gihuboan mo man ako?" nagpakaaron ingnon ako nga nangutana.
"Relaxs ka lang Iska, mao ra man god og nasingo ko gikan sa imong bilahan ang pinakapaborito kong baho?" nagpanilap ang ngabil sa akong bana.
"Mao ba diay Dor?" sobra kaparaygon ang akong tinubagan.
"Kanunayaaa kiniiii Iskaaaa ... kayyyy ganahannnn akooo ... magpanimahoooo!" nagkanguhal ang sinultihan sa akong bana.
Sa akong kahibulong ... diriyot molugwa ang akong kalimutaw nga nagsud-ong ni Bador nga gikuyapan. (Kataposan)