Gula 37
“Good day, Mr. Editor,” ni Lonia nga mipunit sa duha ka folder sa iyang mga manuskrito dayong tindog.
Nagmug-ot ang iyang panagway nga migawas sa buhatan ni Rev.
Mipauli si Lonia sa balay nga iyang gipuy-an nga gisanapan ang kaisipan sa tumang kalagot. Nagpangusmo siya. Nahasalibay niya ang duha ka folder sa manuskrito sa iyang mga nobela ug nagpasad kini diha sa sala.
Naglagot siya pag-ayo kang Rev. Dili siya makadawat sa pag-reject niini sa iyang mga nobela.
Taudtaod gipamunit niya ang manuskrito sa iyang mga nobela nga nagpasad sa salog. Iya kining gisubli pagbasa. Alang kaniya, nindot ang maong mga nobela. Sa iyang kaugalingong paghukom, nagmalamposon siya sa paghulagway sa reyalidad sa kinabuhi nga puno sa kapakyasan.
Ngano gyung gi-reject man ni Rev ang iyang mga nobela? Anugon kaayo ang iyang kahago sa pagsulat niini. Nganong dili man makadawat si Rev sa kamatuoran nga gihulagway niya sa iyang mga nobela nga unta mao man kini ang matuod nga nahitabo sa kinabuhi sa mga tawo karon?
Siya mismo nakasinati na og kapakyasan ug kabawo sa gugma. Mao man gani hinungdan nga gisulat niya ang maong mga nobela aron nga bisan pinaagi lang niini, iyang ikapahungaw ang iyang mga kahisamugyo sa kinabuhi. May bahin sa gisulat niyang nobela nga matuod nga nahitabo sa iyang kinabuhi. -- Sumpayan pa