Nalangan nga kabuntagon

Gula 70

Dihay higayon nga misugyot si Destiny ngadto kang Evan nga atubangon na lang nila ang kamatuoran. Tug-anan na lang nila ang ilang mga ginikanan sa matuod niyang kahimtang ug dawaton ang unsa man nga silot nga ipahamtang kanila. Apan nagdumili pagsanong si Evan sa iyang sugyot. Nagtuo ang iyang maguwang nga dili makasabot ang ilang mga ginikanan kanila sa higayon nga ila kining sultihan sa matuod.

Misamot ang kabalaka ni Destiny sa dihang iyang namatikdan nga miinanay nag busyad ang iyang tiyan. Nakaamgo siya nga sa dili madugay dili na gayod matago ang matuod niyang kahimtang. Ingon gani sa nakamatikod na si Nang Nema sa kausaban sa iyang panglawas apan maikog lang kining mobuyag.

Hangtod nga miabot na gayod ang panahon nga misanong na si Destiny sa sugyot ni Evan nga ipakuha nila ang bata nga iyang gisabak. Ang kahadlok ni Destiny sa kasuko sa iyang mga ginikanan maoy nagtukmod kaniya pag-uyon sa gustong mahitabo sa iyang maguwang.

Mao nga milihok dayon sila. Hilom silang nakigkita sa usa ka doktor ug gitug-an ang ilang problema sa pamasin nga katabangan sila niini. Apan nahisagmuyo sila. Mibalibad ang mananambal sa buot nilang mahitabo. -- Sumpayan pa