Gula 81
Pagkasunod adlaw, nagkasabot mi si Roger nga mangaligo og dagat. Maoy among giadto ang Ocean Bay Beach Resort nga nahimutang sa poblasyon sa lungsod sa Dalaguete sa habagatang Sugbu.
Paglabay sa usa ka semana, nagpadala ko’g sulat sa akong mga ginikanan didto sa Bohol. Akong gipaagi sa fast courier aron madali kini sa pagkaabot. Sa akong sulat, gisaysay ko ang tanan. Nga nakig-live in na ko ni Roger. Bahala na’g masuko sila!
Usa ka adlaw niana, nakadawat ko’g tawag sa cellphone. Si Galen ang nanawag. Sa sinugdan, wala nako tubaga ang iyang tawag. Mora’g dili pa ko andam nga makigsulti niya. Gipasagdan ko lang ang akong cellphone nga nagsige’g bagting. Apan si Galen wala gyud molunga sa pagpanawag. Maong nitubag na lang ko sa kadugayan.
“Hain ka na man karon, Belen?” Nangutana dayon si Galen.
“Nia ra’s Pilipinas,” maoy akong tubag.
“Asang dapita? Nangutana ko sa imong mga ginikanan pero wala sila’y gikatubag nako.”
“Dili na importanteng masayod ka kun hain ako karon. Basta kay wa kay angay kabalak-an. Nia ko sa maayong mga kamot.” -- Sumpayan pa