Nalangan nga kabuntagon

Gula 51

“Maayo hinuon nga mibalibad si Daddy aron may higayon pa kita sa paghunahuna sa angay natong buhaton.”

Wala na taposa nila ni Destiny ug Evan ang usa ka semana unta nilang bakasyon sa Pinamungajan. Namalik dayon sila sa siyudad sa Sugbu. Si Nang Nema, ang ilang katabang nga mao ray nahibilin sa apartment nga ilang gipuy-an, nakugang sa ilang pagbalik sa siyudad sa dili tukmang panahon.

“Abi ko bag sa sunod semana pa kamo mobalik dinhi,” nagkanayon ang lagas.

“Namalik na lang mi, Nang,” ni Destiny pa. “Kay wa man sab mi buhaton didto sa probinsiya.”

“Mao kana, Nang,” dason ni Evan. “Gilaay mi didto maong namalik na lang mi dinhi.”

“Gimingaw na sab mi nimo, Nang,” dugang ni Destiny.

Ingon sa nalipay ang lagas sa gisulti ni Destiny. Labaw sa tanan, nalipay kini sa ilang pagbalik sa siyudad.

Nianang pagkahapon, nakamatikod si Destiny nga nag-ilis si Evan. Nakasabot siya nga lumalakaw kini.

“Asa ka man?” Gipangutana niya ang maguwang.

“May lakton ko,” mubong tubag ni Evan.

“Moadto ka na sab sa imong mga tsiks?”

“Dili, uy. May paliton ko.”

“Mokuyog ko.”

“U-unsa? Nganong mokuyog ka pa man gyud?”

“Basta kay mokuyog gyud ko.” -- Sumpayan pa