Gula 21
Pag-abot namo sa bus terminal sa dakbayan sa Tagbilaran, wala na mobulag si Homer nako. Nagdungan mi’g sakay og tricycle paingon sa downtown. Pag-abot namo sa kinapusoran sa siyudad, misugyot si Homer nga mangaon una mi. Wala ko makabalibad.
“Mag-unsa ka man diay dinhi sa siyudad ron?” Gipangutana nako si Homer samtang nangaon mi.
“Mag-withdraw ko’g kuwarta sa bangko,” laktod niyang tubag.
Human sa pangaon, nag-iyaiya na mi’g dalan si Homer. Siya paingon sa banko. Ako paingon sa buhatan sa SSS.
Pag-abot nako sa buhatan sa SSS, gihimo dayon nako ang akong tuyo -- ang pag-follow up sa retirement ni Papa. Gihinabi nako ang usa sa mga kawani sa maong buhatan. Gipasabot ko’g maayo sa maong kawani sa mga hinungdan nganong dugay nakalusot ang retirement ni Papa.
Wala pa gani ko makahuman sa pagpakigsulti sa kawani sa SSS, nasiplatan ko ang pagsulod ni Homer sa maong buhatan. Milingkod siya sa usa ka monobloc chair. Nasabot kong naghulat siya kanako.
Mitindog si Homer ug midali pagduol nako dihang mibiya na ako sa atubangan sa desk sa kawani sa SSS nga akong gihinabi. -- Sumpayan pa