Gula 52
Mogawas na unta si Bradley sa balay sa dihang may duha ka sakyanan nga mihunong sa tungod. Gikalit niya pagsira ang pultahan unya milili siya sa may bentana ug naniid.
Gilanit ni Bradley ang service firearm nga diha sa iyang hawakan sa dihang nakita niyang nanganaog ang mga sakay sa duha ka sakyanan. Pulos armado ang maong mga tawo. Uzi ug armalite ang ilang mga armas. Nakita niyang mipaduol sila sa balay.
“B-Bradley,” maguwang sa hagawhaw ang tingog ni Sandra nga miduol kaniya. “Nga-ngano?”
“May mga armadong tawo nga nangabot,” tubag ni Bradley.
“U-unsa?”
“Pangita’g katagoan. Nagtuo kong ikaw gyu’y tuyo nianang mga tawhana. Tingalig may nakataho kanila nga nia ka dinhi.”
Wala na magdaghan og langas si Sandra. Misulod kini sa kuwarto.
Nagpabilin si Bradley sa kilid sa bentana. Gipanid-an niya ang mga tawong armado nga nagpadayon sa pagpaduol sa tugkaran sa balay. Maoy nag-una kanila ang lalaking bigotilyo nga nagbitbit og Uzi.
“Sandra,” sangpit sa bigotilyong lalaki nga nagbarog sa tugkaran sa balay. “Si Morris kini. Nasayod kong naa ka diha sa sulod. Gawas diha kun dili ka buot nga kami ang mopugos sa pagsulod.” -- Sumpayan pa