Gikasilagan ko ang kalibotan

Gula 46

Maghikay na unta si Sonia sa iyang panihapon sa dihang nakadungog siya nga may sakyanan nga mihunong sa tungod sa balay nga iyang gipuy-an. Midali siya pagpaingon sa sala ug midungaw sa may bentana. Sanglit mao pa may pagkilomkilom ug hayag usab ang siga sa sugang dagitabnon sa poste sa duol, nakaila dayon siya sa nahiabot. Si Roy!

Migawas siya sa balay ug gibuksan ang gate aron makasulod si Roy. Nangatahoran si Roy kaniya. Unya nagkuyog na sila paingon sa sulod sa balay.

“Wala ba ko makadisturbo nimo?” Nangutana si Roy sa dihang naglingkod na sila sa sopa sa may sala.

“Wala man,” mubong tubag ni Sonia.

“Enjoy ka ba sa imong trabaho?” Sukit ni Roy.

“Nganong nakapangutana ka man niana?” Misumbalik pagpangutana si Sonia nga nakasabot nga nabungat ni Roy ang maong pangutana aron lang duna sila’y mahimong tema nga panagsultihan.

“Basta lang. Gusto lang kong masayod.”

“Well, enjoy kaayo ko sa akong trabaho. Very challenging.”

“Kombinsido ko sa imong gisulti. Full of challenges kuno ang journalism.”

“Ikaw, enjoy ba sab sa imong trabaho?” -- Sumpayan pa