“Unsaun na man lang kun masayod si Debra mahitungod kang Sandra?”
“Mao bitaw kanay akong gipanagan-an. Nasayod gud kong selosa kaayo si Debra. Mao nga aron dili magselos si Debra kang Sandra, angkona si Sandra nga imong pag-umangkon.”
Tok! Tok! Tok!
Mao pa lang gayo'y paghunong sa pagbagting sa cellphone ni Sandra dihang may nanuktok sa pultahan. Dili ang iyang amahan maoy nanawag kundili si Morris Sta. Ana na usab. Lakip si Morris nasayod na diay usab sa iyang paglayas gikan sa Davao.
Tok! Tok! Tok!
Miusab ang nanuktok. Midali si Sandra pagpaingon sa pultahan ug giablihan kini. Si Bradley ang diha sa gawas.
“Nakadisturbo ba ko nimo?” Ubay sa pahiyom ang pangutana sa ulitawo.
“W-wa man,” tubag ni Sandra nga nadani sa puti ug tupong nga mga ngipon sa ulitawo.
“Abi ko’g nakatulog ka na kay dugay ka man nga nakaabli.”
“Nag-ilis man gud ko maong wala dayon nako mabuksi ang pultahan. Sorry, na.”
“No, its okey.”
Mora’g gibayaw si Sandra dihang nasingo niya ang male scent ni Bradley.
“Andam na ang lamesa,” matud ni Bradley. “Mamahaw na ta.”
“Sige,” niya pa. “Mosunod na ko.”
“Kaon og maayo, Inday,” matud ni Nang Diday ngadto ni Sandra sa dihang namahaw na sila. “Tingalig higutman ka dinhi. Ayaw lang kauwaw namo.” -- Sumpayan pa