Pasiuna: Tinuod kining maong hitabo. Giilisan lang ang pangalan sa hingtungdan pagpanalipod sa ngan sa ilang pamilya. Hinuon, popareha kini’g ulohan sa usa ka nobela nga migawas taudtaod na dinhi sa Banat News.
Matahom si Katrena. Tabonon ang pamanit, maayong pagkalalik ang iyang lawas ug may gitas-on nga pwedeng makig-indigay sa mga kontestans sa Miss Cebu.
Bugtong siyang anak ug gumikan niini labihan ang pagpangga kaniya sa iyang mga ginikanan. Mao man gani nga bisan asa siya molakaw aduna siya’y kauban. Dili relihiyosa ang dalaga busa di siya tigsimba kun ma-Domingo. Mahilig lang siya magbasabasa ug motan-aw sa tv.
Daghan ang mga ulitawo nga naninguha kaniya apan wa pa siya’y gisugot gumikan kay matud pa wa niya makit-i sa mga nangulitawo kaniya ang iyang gipangita sa usa ka lalaki. Milapas na’g diyutay sa kalendaryo ang iyang edad apan wa siya mabalaka niini.
Usa ka gabii niana, bugnaw ang huros sa hangin ang misud sa lawak ni Katrena nga maayong pagkahinanok sa iyang kama. Madanihon kaayong tan-awon ang dalaga nga naghigda nga nagsul-ob lang og taas nga t-shirt ug underwear. Nawalis ang iyang habol ug miamag sa diyutay’ng kahayag gikan sa adyastibol nga lampshade sa lawak niini ang duha niya ka puting mga paa.
Lapas na kadto sa tungang gabii sa dihang maoy namat-an ni Katrena nga migilok ang wang bahin sa iyang liog. Nagtuo siyang ang iyang buhok ang midapat sa iyang liog gumikan sa hangin gikan sa abli nga bentanang may rehas.
Mitalikid siya ug gipiyong pagbalik ang iyang mga mata. Apan ang pikas na usab nga liog ang daw gipagilokan. Mihayang siya ug sagol kakulba ug kagilok ang iyang gibati labi na gyud sa dihang miinanay pagdailos ang kagilok ngadto sa iyang dughan.
Apan kalit lang usab nga nahunong ang nabatyagan sa dalaga ug nakatug siya pagbalik.
Milabay ang mga gabii nga wa na niya masinati ang maong talagsaong hitabo. Apan usa ka gabii niana, lapas na kadto sa alas dose sa dihang iyang nabatyagan nga may mihinol sa iyang duha ka paa.
Kalit niyang gibuka ang iyang mga mata apan wa siya’y nakita ug padayon ang ingon sa hapohap sa iyang paa sa di makitang linalang ug padung kini ngadto sa tinagoang bahandi sa dalaga.
Buot siyang mosinggit apan way tingog nga mogawas sa iyang baba. Kalit siyang mibangon ug mipaingon sa kuwarto sa iyang ginikanan. Didto siya motiwas og katug apan wa lang niya suginli sa hitabo sa dihang gipangutana siya. Lain ang iyang pasangil nga hinungdan.
Nianang pagkasunod nga gabii, lapas na usab kadto sa alas dose, nabatyagan na usab niya nga may mihinol sa iyang duha ka paa. Padung sa itaas ug ning higayona nanlimbasog siyang makontrolar ang iyang kahadlok. Kalit niyang gihapak sa wa niyang kamot susamag gadagpi og lamok ang dapit nga iyang nabatyagan nga gihinol.
Apan labihan niyang kakurat sa dihang maoy iyang nahikapan ang naggahi nga kargada sa usa ka lalaki. Dali siyang mibangon ug mipaingon sa lawak sa iyang ginikanan ug didto gisugilon na niya ang nahitabo.
Pagkabuntag, gida si Katrena sa iyang ginikanan ngadto sa ilang kura paroko. Gisugilon nila sa pari ang tanang nahitabo. Matud pa sa pari nga usa ka dautang espiritu ang maong linalang ug gitawag kini sa uban og incubus. Aduna pa gani kuno susama’g hitabo nga milampos gyud ang incubus sa iyang tinguha ngadto sa babaye.
Gihatagan og medalyon si Katrena ug gipakwentas kini niya uban sa tugon nga mangadye sa di pa matug ug sa iyang pagmata matag buntag.
Sukad niadto, wa na maghamok ang dautang espiritu sa dalaga nga hapit molampos sa iyang tinguha. (Kataposan)