Gula 4
Human matubag ang iyang pangutana, mibiya ni Nang Luding sa iyang atubangan ug misaka sa taas sa balay diin ang mga bedrooms aron paghatod sa pagkaon ni James.
Nahibilin si Denia sa may komedor nga naghinuktok sa atubangan sa lamesa. Maoy diha sa iyang hunahuna ang ngalan ni James. Nahibulong siya kun nganong magpahatod man kini og pagkaon ngadto sa kuwarto niini. Nganong dili man kini mokanaog aron makigdungan og pangaon sa mga ginikanan niini atubangan sa talad-kan-anan?
Inutil kaha si James? May kakulian kaha kini sa panglawas? Dili kaha kini makalakaw mao nga magpahatod na lang kini og pagkaon ngadto sa kuwarto niini? Kining maong mga pangutana gisukot ni Denia sa iyang kaugalingon.
Naigking si Denia dihang nabati niya ang pagbagting sa telepono didto sa sala. Mao pa siya makamatngon nga taudtaod diay siyang nahiunlod sa lawom nga paghinuktok. Nahinumdom siya nga gitugon siya ni Nang Luding sa pagpahibalo sa magtiayong Ricarte nga andam na ang lamesa alang sa paniudto.
Milihok dayon siya. Giadto niya ang lawak sa magtiayon.
Nianang pagkahapon, giduol si Denia ni Nang Luding samtang nanglimpyo siya sa kusina.
“Ikaw kunoy pahatdon ni James sa iyang panihapon unya,” sa lagas pa.
“U-unsa?” nakugang si Denia. -- Sumpayan pa