Nag-ulan ning buntaga sa Pebrero. Gilaayan ko nga mibangon, gawas nga way opisina kay Domingo, nagsakit sab ang akong dughan. Wa koy kadasig nga misandig sa headboard sa akong kama. Mitan-aw ko sa gikuwadrong picture namo ni Sam nga gipatong sa center table sa kilid sa akong kama.
Nanghalang ang akong mga mata. Ang maong picture nakuha sa among pagpangaligo ni Sam sa Plantation Bay Beach Resort sa Lapulapu. Birthday nako kadto dihang nag-night swimming kami.
Mibangon ko ug giablihan ang jalousie sa akong lawak. Nabasa og diyutay ang akong nawong nga naigo sa salibo sa ulan. Misagol kini sa akong mga luha nga wa ko na gyod kapugngi.
"First love nako siya, Lannie. Nakigsulti siya nako kay gusto niyang sumpayan ang naputol namong gugma."
Sakit kaayo ang gipahibalo ni Sam nako dihang gipangutana ko siya kun kinsa ang babaye nga iyang gikauban sa pagpangaon sa Jollibee sa Colon kagahapon. Nakita ko man gud sila samtang misuroy ko sa downtown human sa akong trabaho sa usa ka kompaniya sa siyudad. Halfday lang kami kun Sabado. Human sa paggawas ko sa opisina kay gradwado man ko sa Commerce, sa Jollibee ko naniudto maong nakita ko si Sam ug ang babaye.
"First love never dies ra ba, Sam. Don't tell me nga pilion mo siya kay nako." Hapit di madungog ang akong tingog.
"I don't know, Lannie. Naglibog ko. Yes, lisod kalimtan ang unang gugma."
Nahasol ako sa tubag ni Sam. Gimahal ko kaayo siya. Hapit na mausa ka tuig ang among relasyon. Manager siya sa usa ka banko sa siyudad. Di kay ambongan lang siya, nakaayon sab ko sa iyang kinaiya. Hinay siyang manulti ug morag di makamaong masuko. Nagkasabot na unta kaming magpakasal si Sam. Apan ania, mibalik ang kanhi niyang hinigugma.
Gitug-an ni Sam nako nga mitrabaho ang iyang hinigugma sa laing nasud bisan sa iyang pagsupak. Maong nagkabulag sila. Usa kini ka nars.
Gamay ra ang akong gikaon sa pamahaw kay wa koy ganang mikaon. Si Sam ang akong gihunahuna. Ug samtang nagtindog ko duol sa among hardin, nagtutok ko sa mga bulak nga rosas nga ako mismo ang nag-atiman. Sa akong paminaw, daw wa nay kahumot ang mga rosas. Morag nangalarag na ang mga gihay niini kay daw nabatyagan ko nga magpalayo na kanako si Sam.
Naigpot ko dihang may mikupot sa duha ko ka mga abaga. Milingi ko. Si Sam diay. Nindot kaayo siya’g pinahiyoman nako. Iya kong gigakos. Migakos sab ko’g hugot kaniya.
"Sa wa pa ko moanhi, Lannie, nakigsulti una ko sa akong ex-girlfriend. Gisultihan ko siya sa tinuod kong gibati, nga ikaw ang labaw kong gimahal."
Labihan ang kalipay nga akong gibati sa gisulti ni Sam.
"T-Tinuod, Sam?"
"Oo, Lannie. Ug karon, wa ka nay angay nga kabalak-an. I know nga nahasol ka sa pagbalik sa kanhi kong trato. Di ko mahimong masayop, mas gihigugma ko ikaw kay kaniya."
Mipiyong ko dihang gihagkan ni Sam ang akong mga ngabil. Morag di na ko gustong mahuman pa ang maong mga yugto.
Mibiya si Sam nako. Mipaingon sa hardin. Nagkutlo siya’g tulo ka bulak nga rosas. Unya iya kining gihatag nako. Mapahiyomon ako nga akong gidawat ang mga rosas. Ug nahanggap ko ang kahumot niini.
Nagkuptanay kami sa kamot si Sam nga misulod sa balay. Sa balay nga ako na lang ang nagpuyo kay patay na ang akong mga ginikanan ug bugtong akong anak. Unya nanulod kami sa akong lawak. (Kataposan)