(Gula 73)
Wala ko magdahom nga masuko si Darwin sa akong gisulti niya. Abi ko bag okey lang para niya ang akong gibuhat nga pag-abort sa bata nga akong gisabak nga siya maoy amahan.
“Nganong gibuhat mo man kini nga wala magpahibalo nako?” Misaka ang tingog ni Darwin. “Aron unta masayod ka sab sa akong opinyon kun mosugot ba ko o dili nga ipa-abort ang bata.”
“Dili na ko makapaabot pa nimo,” nangatarongan ko.“Gusto kong makuha sa labing daling panahon ang bata nga akong gisabak kay lisod nag masayran sa akong mga ginikanan ang akong kahimtang.”
“Dili ba giingnan ko man ikaw nga andam kong manubag kun unsay mahitabo nimo? Dili ba gipasaligan ko man ikaw nga dili ko ikaw pasagdan kun ugaling magbunga ang kinawatkawat natong pagtagay sa lawasnong kalipay?”
“Tinuod kana. Pero dili ba giingnan ko na man usab ikaw nga dili pa ko andam nga mahimong inahan? Daghan pa ko’g gustong himuon sa akong kinabuhi, Darwin. Babag sa katumanan sa akong pangandoy ang bata.”
“Selfish kang dako, Editha!”
“Unsa?”
“Mao ray imong gihunahuna ang imong kaugalingon. Ang imong kalipay. Wala nimo hunahunaa ang kinabuhi nga may katungod unta nga makakita sa kahayag sa kalibotan apan imo kining gikutlo gikan sa imong sabakan.”
Wala ko makatingog sa gisulti ni Darwin.
“Bangis ka, Editha,” mipadayon paggahot si Darwin. “Selfish nga pagka inahan sa usa ka batang inosente. Walay labot ang bata nga imong gisabak kun unsa man ang nahimo mong kasal-anan dinhi sa kalibotan. Nganong imo siyang gilaglag? Nganong gihikawan mo siya pagsud-ong sa kahayag sa kalibotan? Ngano, Editha?”
“May kaisog ka lang sa pagsudya kanako og ingon niana tungod kay dili man ikaw ang nahimutang diri sa akong dapit,” giingnan ko siya. “Nagsalig ka lang kay lalaki ka man. Samtang ako nga babaye ug maoy mimabdos mao ang mahan-okan sa tanang gumonhap sa akong pagmabdos. Akoy alkanse.”
“Bisan pag unsay imong ipangatarongan, dakong sayop ang imong gihimo. Sala kini atubangan sa mga mata sa Dios ug sa mga tawo. Walay hinungdan kang matang sa pagka babaye! Ang sama kanimo dili angay seryosohon sa pagpakigrelasyon.”
Namula ang nawong ni Darwin gumikan sa hilabihan nga kasuko. – Sumpayan pa