Nagtuo kong masuko si Dirk sa akong gisulti apan nalipay hinuon siya. Naglibog ko sa iyang reaksiyon.
"Nganong nalipay ka?" Giingnan ko siya.
"Tungod kay good news kini, Ingrid," niya pa. "Di ba dugay na man tang gustong makabaton og anak?"
"Tinuod kana. Pero nasayod kang sterile ka. Dili ka makapaanak og babaye. Mao kanay findings sa uro-genito specialists nga naghiling nimo."
"Then it's time to prove nga nasayop siya. Dili diay ko inutil, Sweetheart."
Wala ko motingog. Gitutokan ko lang si Dirk nga malipayon kaayo.
"Unsa ba diay gusto mo nga akong buhaton?" Gisukit ko ni Dirk. "Gusto ka nga masuko ko nimo kun matinuod nga nagsabak ka? Nga magduda ko nimo nga may lain kang lalaki nga gikabuangan nga maoy amahan sa imong gisabak?"
"Mao kanay akong gi-expect, Sweetheart. Nagtuo kong dili mo ikahimuot ang akong kahimtang kun matinuod man nga nagsabak ko."
"Dili kana mahitabo, Ingrid. Nasayod kong ako ray lalaki sa imong kinabuhi. Nasayod kong dili ka makahimo pagluib nako. Ug kun mabdos ka man gyod, way laing amahan sa bata kundili ako. Sayop ang doktor nga nag-ingon nga baog ko."
Aron pagseguro nga nagsabak ko, nagpahiling ko sa higala kong OB-GYNE. Nakugang siya sa akong pagtungha sa iyang klinika kay midaot kuno kog maayo. Gihiling dayon ko niya human ko siya kasultihi sa akong tuyo.
"Congratulations to both of you," miingon ang OB-GYNE human ko niya maeksamin. "Positive, nagsabak si Mrs. Salcano."
Labihang lipaya ni Dirk. Nakig-high five pa siya nako.
"Ang bata nga imong gisabak diay tingali hinungdan sa pagpangatol sa imong genitals, Madz," giingnan ko sa doktora nga akong higala.
Wala ko motingog. Wala ko masayod kun angay ko bang ikalipay ang akong pagmabdos. (Sumpayan pa)