Teks gikan sa barkong nalunod

Palihug kaloy-i intawon ko. Survivor ko sa Princess of the Stars. Nia pa ko sulod sa barko. Tagai intawon kog load aron makapahibawo ko sa akong pamilya!" mao ni teks nabasa niya sa iyang selpon. Nahikurat, nasurpresa ug gikuyawan si Ofelia samtang naglingkod sa sopa sa sala sa balay sa iyang mga uganganon. Wa pa ra ba makit-i si Oscar iyang pamanhonon.

Nagpuyo na si Ofelia sa iyang mga uganganon. Mabdos na siyag lima ka buwan. Wa pa sila makasal ni Oscar. Gipasaligan siyang Oscar nga anha lang siya puyo sa ilaha. Paangkon sila ni Mama Terry ug Papa Jessie niya. Pakasal sila human sa duha ka tuig nga kontrata niya sa Saudi isip welder. Makatigom siyag igong kuwarta para sa ilang kasal ug mga panginahanglan isip bag-ong magtiayon. Tungod sa gugma ug sinaaray sa usag-usa, nisugot si Ofelia. Wa man siyay mahimo. Ang-ang mag makigbuwag siya nga mabdos na man siya. Unya gikauwaw na siyas iyang mga ginikanan. Kay namabdos siya bisag wa pa makasal.

Si Oscar gradwado og Mechanical Engineering. Apan samtang wa pa nadawat sa giaplayang trabaho nagkalingaw og panguyab. Kay lagi sa hayskul pa suod na sila si Oscar ug Ofelia, ug may pagbati sab si Ofelia niya, nagkahigugmaay sila. Si Ofelia nakahuman og Accountancy. Nag-review pa siya alang sa board exam pagka-CPA. Samtang nag-review, nagsige sab siyag date-date sa iyang hinigugma. Hangtud nangaanod sa sulog sa pagbati. Wa gyud kalikayi nila nga mabuhat ang bulohaton nga alang lang sa mga minyo. Nagbunga ang ilang pagminahalay tungod sa kainit sa dugo sa kabatan-on. Maong naningkamot si Oscar nga makatrabaho sa abroad. Aron makahatag og maayong kaugmaon sa ilang umaabot nga anak.

Usa ka bulan nang missing si Oscar. Nagsusi iyang ginikanan sa opisina sa Sulpicio Lines. Wa pa gyud makit-i iyang lawas, patay o buhi. Busa nisumitir na lang og samples sa DNA si Terry ug Jessie. Wa pa sila nidawat sa P200,000 nga tanyag sa kompanya sa barko.

Nadawat na og trabaho si Oscar isip welder sa usa ka kompanya sa Saudi Arabia. Duha ka tuig iyang kontrata. Ang iyang schedule sa paglarga padulong sa Saudi, Hulyo 2. Nidalikyat pa gyud siyag pauli gikan sa Manila. Dihang nakabayad na siya sa placement fee (nga hinatag sa iyang mga ginikanan) ug natakda na iyang paglarga, gusto pa gyud siyang manamilit sa iyang pamilya. Kay di man sab lalim. Wa pa gyud siya kabiya sa Pilipinas sukad masukad. Unya karon, duha pa ka tuig, una siya kabalik. Nidalikyat gyud siya. Nisakay sa Princess.

"Ma! (nag-mama ug papa na siyas iyang mga uganganon. Kay diha na god siya puyo sa ila) Tan-awa ra god ni akong selpon. May nangayo mag load. Survivor kono sa Princess of the Stars. Na-trap kono sulod sa barko," ni Ofelia ngadtos iyang Mama Terry pagbiya niya sa kusina diin may giluto siya.

"Ha! Tagai lag load balig usa ka gatos!" ni Terry. "Kay ako sang lodan og mao gihapong kantidad," ni Terry nga magtutudlo sa Amiraw Academy sa ilang lungsod.

"Unsa na inyong gikagubtan?" nakasukot sab si Jessie nga nakadungog nila samtang nagtan-aw sa TV Patrol sa ilang telebisyon karong kilumkilom. Magtutudlo sab siya sa parehang tunghaan nga gitrabahoan ni Terry.

"Naay survivor sa Princess of the Stars nga nangayog load," ni Terry.

"Hala lodi. Tagaig balig usa ka gatos sa akong selpon," ni Jessie.

Unya may panawagan sa TV Patrol. "Giawhag si Mr. and Mrs. Jessie Villaflor nga paadtoon sa Cosmopolitan Funeral Parlor sa Junquera St., dakbayan sa Sugbu. Kay dunay biktima nga morag ni-mats sa ilang DNA," matud ni Lino Listadiso ang tigsibya.

Nanigang mga mata sa managtiayon ug ni Ofelia. Daw giugbok silang kandila sa ilang nahimutangan. Nangluspad silag gipaningot. Di sila gustong moabot kining higayona. Bugtong nilang anak si Oscar ug sakit kaayo sa ilang balatian kun mahanaw sa dayon ilang anak. Nagminatay ang tulo.

Pagkataudtaod, nanindog sila. Nag-ilis.Ug nibagolbol si Ofelia.

"Kasalbahis gyud sa mga tawong mangingilad. Hasta ang mga biktima sa Princess of the Stars ilang giapil-apil."

Nakaamgo siya nga ang nangayog load, mangingilad ra gyud to. Sa gidugayong nagtikyaob ang barko sa Romblon, wa na gyuy buhi sa sulod niini. (Kataposan)