Ang gugma sa gipatakdan

Dugay na siyang naibog ni Leilani ug kini nagsukad pa niadtong kauban pa sila sa elementarya. Sa higayon nga iyang makita si Leilani dili gyud niya tuyoon nga mokusog ang kuba sa iyang  dughan. Ug alang kaniya ni Pacio iyang gugma kang Leilani way kamatayon.

Ug karon hingkod na silang mga dalaga ug ulitawo misamot ang gibati niyang gugma sa dalaga. Apan may problema siya kay ang kaliwat nila ni Leilani gidungogdungog nga ungo.

Ang amahan niini nga si Arcadio anak kuno sa labing mangtas nga ungo didto sa kasikbit nga balangay sa Ibid. Namatay gani kuno ang inahan ni Arcadio dihang gilutos kini sa mga lumolupyo didto sa balangay sa Ibid.

Ug kay hiapsan natusaktusak ang lawas kuno sa inahan ni Arcadio sa tinalinsang bagakay ug kawayan ug dihadiha kini namatay. Ug kay naminyo man si Arcadio dinhi sa taga ilaha sa balangay Kuwaknit maong dinhi na lang usab manimuyo ang mga ginikanan sa dalaga kay lagi taga dinhi man si Besing ang inahan ni Leilani sa balangay Kuwaknit.

Pero, alang kang Pacio di siya motuo bahin sa tabitabi sa kaliwat sa mga ginikanan ni Leilani kay gihigugma niya kini sa hilom. Ug dihang nakalugar siya’g kuyog sa dalaga usa kadto ka gabii niana, iya kining gihatod sa ilang balay ug gipadaygan samtang nanglakaw pa sila sa dalan.

“Dili pa man ko mag-apil-apil ana, uy, Pacio,” hinay’ng tubag sa dalaga. “Masuko man ang akong tatay ug nanay basta mag-uyab-uyab ko. Gusto nila nga makahuman ko sa pag-eskuyla...”

“Hisabtan tika, Lan,” ni Pacio pa usab. “Pero, andam kong magpaabot bisan kanus-a pa...bisan pag napulo pa ka tuig gikan karon...”

Mipahiyom lang ang dalaga sa gisulti ni Pacio. Unya, wala damhang miabot na diay sila sa may tugkaran sa balay nilang Leilani. Giagda siya ni Leilani sa pagdayon. Midayon si Pacio. Ug didto sa taas gidalitan ni Leilani si Pacio og usa ka mabugnaw kaayong pineapple juice.

Miinom dayon si Pacio. Ug sa iyang pag-inom, namatikdan niyang morag migilok ang iyang tiyan ug morag di niya mapugngan ang iyang kaugalingon, busa nananghid siya nga mopauli. Pag-abot niya sa ilaha mora’g migaan ang iyang lawas ug bisa’g unsaon niya’g kontrol ang iyang kaugalingon, morag gibitad gyud siya paingon sa taas sa ilang kisame. Nakakatkat gyud siya. Ug unya nalipong siya ug natagak sa ilang salog.

Ingon sa nagdamgo lang si Pacio sa nahitabo kaniya kagabii ug wa niya kini hatagi’g gibug-aton. Nianang pagkasunod gabii, namisita siyang Leilani. Mingaw ang balay sa iyang pag-abot. Mapahiyomon kaayo ang dalaga nga miabi-abi kaniya.

“Kumosta na ang akong gugma, Lani, may pag-asa o paglaom ba ako?” ni Pacio pa nga larino kaayong militok sa maong mga pulong.

“Kagabii ko ra man ikaw’ng gisugot, Cio,” sa dalaga pa. “Total, sa madugay ug sa madali, kaabin ka na man namo....”

Unya nanginit ang lawas ni Pacio ug namatikdan niyang nanghugot ug sama sa naandan di niya makontrol ang iyang kaugalingon, mituwad siya. Ug nakita pod niya si Lily nga mituwad tupad kaniya. Natakdan na si Pacio sa pagka-ungo. -- Kataposan