Gula 48
“Mga VCDs ug DVDs ang akong paliton,” tubag ni Dirk sa akong pangutana samtang ang iyang mga mata didto ra sa unahan sa karsada nga gisubay sa among gisakyan.
“Di ba duna may daghan niana didto sa SM?” Gisukit ko siya.
“Wa sa SM ang mga VCDs ug DVDs nga gusto nakong paliton.”
“Unsa?”
“Yes. Mga x-rated films ang gusto nakong paliton. Anha ra kini mapalit sa mga bangkita sa Colon.”
“Nganong mopalit ka man nianang matanga sa mga salida?”“Mao niy gitudlo nako sa kauban nakong polis. Makapakondisyon kuno ni. Basin pa diay kun makatabang ni aron momabdos ka na.”
“Pangpahigal ra man na. Wa nay koneksiyon sa pagmabdos. Di na ta angay motan-aw niana kay wa man tay problema bahin sa atong sex life.”
“Sagdi lang god.”
Tuod man, pag-abot namo sa Colon namalit gayod si Dirk og x-rated films. Usa ka lalaki ang iyang giduol ug gipakigsultihan. Hinay kaayo ang ilang tingog. Daw dili sila gusto nga may makabati sa ilang gipanagsultihan. Matag karon ug unya magpanglingi ang lalaki. Unya gidala mi niya ngadto sa usa ka cubbyhole.
“Pili lang, Sir,” sa lalaki pa nga mipagawas sa tanan nilang stock sa x-rated films. “Kun daghan imong paliton, hatagan ta ka’g maayong presyo.”
Namili si Dirk. Igo lang kong mitan-aw sa gibuhat sa akong bana. Kadali ra siyang nakapili. Napulo ka x-rated film video ang iyang gipalit. Giputos dayon kini sa lalaki og itom nga plastik human makabayad si Dirk.
“Di ba dakponon man ang mga x-rated films?” Nako pa dihang nagdagan na ang among gisakyan paingon sa among gipuy-an sa bukirang bahin sa siyudad sa Sugbu.
“Oo,” ni Dirk pa. “Pero dili seryoso ang kampanya sa kagamhanan batok sa pornography. Lugak kaayo. Mao nga kami, manakop lang sab kun may order ang among labaw.” -- Sumpayan pa