Usa lang kanhi ka tiglimpiyag sapatos sa aseras si Bonton. Apan gumikan sa maanindot niyang tingog, nahimo siyang sikat nga singer. Nadiskubrehan ang iyang abilidad sa usa ka producer og mga singing talents sa lokal nga industriya. Gigalam pag-ayo hangtod mitubo ug milambo ang iyang kabantog. Tanang kanta nga gibuhatag CD ug DVD sa mga recording bars nga nanag-ilog pagkuha niya, pulos miklik. Iyang boses ug estilo sa stage, gikan sa mga batan-on hangtod na sa mga tigulang, gihangop sa tanan.
Wala mapugngi ang iyang pagsulbong. Nagkanitkanit lang ang listahan sa iyang mga konsiyerto dinhi sa ato ug sa gawas sa atong nasud. Sa laktod, ang tibuok kalibotan miluhod ug misaludo sa talagsaong abilidad nga iyang nahuptan. Gani, gitawag man siya’g SUPERSTAR OF ALL SEASONS. Bisag asa iyang show, kanunay’ng gidumog sa bagang duot sa katawhan, kinsa naulipon pag-ayo sa iyang daw walay kamatayong mga awit.
Gumikan niini, dihang giinterbiyu siya sa media miingon siya: "Ang akong ka sikat dili ug dili na matupngan ni bisan kinsa. Tungod kay ang akong kasikat labaw pa ni Jesus Christ. Usa lang kasinyas nako sa mga tawo nga nanan-aw sa akong pasundayag kun unsay akong gusto nga ipabuhat nila, kini ilang tumanon. Gani, mora man silag mabuang kun makakita nako."
Paglabay sa pipila ka adlaw human niadtong iyang gipamulong, nauyog ang tibuok kalibotan sa usa ka makapakugang nga balita: "ANG SUPERSTAR NGA SI BONTON GIPUSIL-PATAY SA USA SA IYANG MGA FANS HUMAN SA IYANG CONCERT SA AMERIKA."
"Matay, buanga no?" Nagkanayon ang usa ka estudyante samtang nagbasa sa detalye sulod sa Lim's Newsstand. "Ang kinabuhi sa tawo di gyod mahibaw-an. Bisag unsa nimo ka sikat, basta moabot na ang imong kataposan, wa gyod kay mahimo. Di gyod kang maka-di!"
Samtang sa sala sa kombento, nagpanglingolingo si Fr. Ivan,kinsa gianugonan nga nagsud-ong sa hitsura ni Bonton didto sa newspaper nga iyang gigunitan. "Nakalimot na man god siya ... nga kun siya Superstar, may Superstar pa nga mas labaw pa niya, kang kansang ka popularidad lisod hitupngan sa tawo. Sanglit ang tawo, binuhat lamang Niya. Mao nga gipaila si Bonton kinsa Siya? (Kataposan)