Panadtaran, San Fernando, Cebu
Duha na lang ka semana ang paaboton gikan karon mao na ang Valentine’s Day o adlaw sa mga managhigugmaay. Pero, alang kang Bandoy mahulog gyud sa panultihon nga apil siya sa firing squad kay wala na man siya’y uyab.
Diha unta kadtoy taga sityo Banga nga si Nitay apan iyang gibuwagan kay lagi puwerte ka palakira. Tiaw mo nay daghan diay kaayog uyab si Nitay ug dili siya gusto sa matang sa babaye nga ingon niini, busa wala dayon niya dugaydugaya ang pagdesisyon nga sa sunod nilang panagkita ni Nitay iya dayong gibuwagan.
Ug mao na ni ron nga naminghoy ang nawong ni Bandoy dihang gianha siya sa suod niyang higala nga si Kardo ug misugilon pa kini kaniya nga andam na siya karong umaabot Valentine’s Day kay si Menciang nga iyang uyab ready na usab sa ilang sabot sa ila unyang panag-date.
“Maayo ka, bay Kardo, da, kay duna ka nay uyab samtang ako wa pa gyud tawon,” ni Bandoy pa nga naghapuhap sa iyang tangkugo.
“May panahon pa, Bay Bandoy, uy, nga makakita ka pag uyab. Layolayo pa bitaw tong Valentine’s Day. Lihok dayon, bay,” ni Kardo pa nga nagtingsi. “Niay daghang dalaga dinhi sa ato, sugdi na kun kinsay imong kursonadahan...”
“Pulos na sila dunay mga uyab, bay Kardo,” hinay ang tingog ni Bandoy. “Si Irma uyab ni Tasyo, si Miling uyab ni Dado, si Calixta uyab ni Sinto, si Tinang uyab ni Pedring. O, kinsa pa man dinhi sa atong sityo ang akong masiphod, wala na gyud...”
“Husto tuod, no,” midiyong ang nawong ni Kardo. “Pero, bay, may nalimtan ka, si Ayang diay. Wala ka kahunahunang Ayang?”
“A, dili ko ana niya, bay, uy. Sayod ka bitaw nga gidungog-dungog na sila dinhi sa ato,” mitutok si Bandoy kang Kardo.
“Ungo ang buot mong ipasabot? Sus, tuo ka man ana. Wala nay ungo rong panahona, uy. Kun duna pa duna na untay gipamugno dinhi sa ungo kay nia man dinhi magpuyo, ug silingan pa gyud nato ang gidungogdungog nga Masay-Pikto, ang mga ginikanan ni Ayang,” mibawos pagtutok si Kardo kang Bandoy. “Sus, baya nimo, pang-Valentine’s lang god. Guwapa man pod na si Ayang ba...”
Tuod, gipanguyaban dayon ni Bandoy si Ayang ug sulod sa usa ka semana nga pangulitawo ni Bandoy kang Ayang, gisugot siya sa dalaga ug may mga pulong pang gipataban si Ayang ngadto kang Bandoy ug matud pa niya,” di ka mauwaw, Doy, nga gidungogdungog ra ba mi dinhi sa ato nga mga ungo kuno...”
“Di ko motuo ana, uy. Ako maoy ungo kay kada gabii ko nga mamisita nimo,” pasiaw ni Bandoy. “Unya, ayaw baya kalimot, ha, karong Valentine’s Day...”
Miyango ang dalaga. Tuod, nalipay si Bandoy kay may uyab na siya ug maoy iyang plano nga gikan nga manuroy sila sa may plasa sa seawall, iyang dad-on si Ayang sa usa ka motel, aron didto iyang angkonon ang kaputli niini.
Unya, miabot ang Valentine’s Day ug sila si Bandoy didto mag-date sa may sea wall sa usa ka lungsod nga maoy hugopanan kanunay sa mga managtrabaho. Alergre ang kagabhion sa seawall ug ang mga balod sa dagat mao lamay mabati nila ni Bandoy ug Ayang. Unya, nananghid og kadiyot si Ayang kay mag-CR sa atbang nga restaurant. Wala dangtig dugay may nagdinaganay sa unahan ug dali rang nagkatapok ang mga tawo ug lakip ang mga managhigugmaay nga nanag-date sa may seawall tampi sa dagat nanagan pod paingon sa gitapokan. Inaghat sa kaikag, midali pod og duol si Bandoy kay wala pa ra ba mahibalik si Ayang. Pag-abot niya sa gitapokan nangutana dayon si Bandoy.
“Unsay nahitabo dinhi?” Niya pa ngadto sa usa ka lalaki.
“Gibugno sa ungo, Bay, ug naa, o, daghan kaayog mga samad nga agi sa kinawrasan. Nakasibat ang ungo dihang daghan nang miduol dinhi...” matud sa usa ka lalaki. “Nia, o nahabilin gani ning panyo sa ungo sa dayon na niining lupad...”
Gitan-aw ni Bandoy ang panyo nga gikuptan sa lalaki ug nanagko ang iyang mga mata kay ang panyo man ni Ayang ang iyang nakita. Naa pa gani ang giborda nga pangalan ni Ayang. Dinhi ingon sa kalit nga nalun-os si Bandoy ug karon mituo na siya sa tabitabi bahin sa kaliwat nila ni Ayang ug didto sa may atbang nga restawran lanog nga mitublaw ang awit ni Frank Sinatra nga My Funny Valentine ug nakapanakla si Bandoy. (Kataposan)