Nganong duna man gayod kining bayot sa kalibotan? Tungod niini, nagkadaiyang panahon nga iya sa mga magsusulat nga maghulagway sa gugma sa duha ka linalang kansang kasingkasing napuno sa pagtamihid sa ubang mga tawo sa katilingban. Nganong buhaton man sila sa Diyos unya ang ilang maangkon mao lang ang kataw-an sila sa uban? Mao kini ang dugokan ning mao nga sugilanon.
Si Rene usa ka guwapo nga lalaki, nindot og barog nga gidayeg sa iyang kahigalaan. Maayong modula sa basketball. Sa ilang eskuwelahan, sa mga kadalagahan nagpaabot lang kanus-a sila halari sa gugma sa ulitawo.
Gawas niining iyang pagka guwapo ug maayong modula sa basketball, gikan pa gayod siya sa sapian nga mga ginikanan. Ang iyang amahan, usa ka inilang negosyante sa ilang dapit. Kinsa man kaha ang babayeng dili maibog kaniya? Apan, luyo ning tanan, daghang namatikdan ang iyang mga kahigalaan, usa diay siya ka bayot.
Dili gusto ni Rene nga tawgon siyang usa ka bayot. Tiaw mong usa ka matso nga lalaki, unya tawgon nga usa ka bayot? Naningkamot siya nga molihok nga usa ka matuod nga lalaki. Bisan kun unsaon niya, mamatikdan gayod siya ilabi na sa labing suod niyang mga higala.
“Bay,” matud sa usa sa iyang mga klasmet. “Nganong usahay, magbinayot ka man?”
“Asay bayot?” tubag ni Rene ngadto sa higala. “Gibangkong ka baya.”
“Unya kun dili ka bayot, nganong dili ka man lagi mangulitawo og babaye?”
Ang tinuod lang, mao kini ang dakong problema ni Rene. Kun mag-inusara siya sa iyang lawak gusto siyang mohilak tungod sa iyang kahimtang. Tinuod gayod tingali nga usa siya ka bayot kay bisan kun unsaon, dili siya ganahan sa babaye. Daghang mga babaye nga magpasumbingay sa gugma kaniya. Apan, wala niya sila tagda.
Diha sa iyang lawak panahon sa kagabhion, dili niya malikayan ang pagtan-aw sa hubo nga lawas sa usa ka lalaki. Apan, bisan pa ning tanan, dili niya gustong mahibaloan ilabi na sa iyang mga higala nga usa siya ka bayot. Ang problema niya karon, kun unsaon niya nga mobati og gugma sa usa ka babaye apan dili niya mahimo. Tiaw mo kana nga usa siya ka matso nga lalaki unya usa ka bayot. Sa iyang lawak, dunay mga hulagway sa mga lalaki nga dili gayod siya sum-olan pagsud-ong.
Usa ka adlaw samtang nag-inusara siya sa iyang lawak, nakahukom siyang mosuroy siya sa siyudad. Busa, nangandam kauban sa usa ka higala. Misulod siya sa usa ka mall ug nagpabungaw. Unya didto sa sulod sa mall, daw wala niya kapugngi ang iyang gibati ngadto sa iyang higala.
“Bay,” pulong sa iyang higala. “Naunsa ka man? Nganong gitutokan mo ako sa ingon niana?”
Mihilak si Rene kay ingon sa dili niya masabot ang iyang gibati.
“Bay, morag dili ko na gayod matagoan kining akong pagbati sa usa ka lalaki. Ang matuod dugay na akong nahigugma sa usa ka lalaki sama nimo. Pasaylo-a ako, mao kini ang kamatuoran. Usahay, makahunahuna na gani ako paghikog aron matapos ang tanan.”
“Uy ayaw baya pag-iningon niana Bay Rene. Kun dili mo lipayon, bisan karon, magpamakamatay ako sa imong atubangan.”
Mao kadto ang sinugdanan nga nalimtan ni Rene nga usa siya ka bayot. Ug niadtong higayona, sa kahadlok nga tumanon ni Rene ang iyang bahad nga magpakamatay siya atubangan sa iyang higala, walay nahimo ang higala gawas sa pagpasiundayon sa gustong buhaton ni Rene.
Ang amahan ni Rene, walay nahimo sa nahitabo sa iyang anak. Nasayod siya nga dili lang si Rene nga dunay usa ka pagbati sa usa ka lalaki. Ang iyang plano niya alang kang Rene para mokita kini, iya kining tabangan tungod kay bisan unsaon, iya man gayod kining anak, natural, nagkinahanglan kini sa iyang pagtabang sa tanang panahon samtang siya may kinabuhi pa. – Kataposan