Keanna walay TF sa campaign ad ni Defensor

Nagkalig-on ang relasyon ni Keanna Reeves ug sa iyang French boyfriend nga si Sofian Ait. Gani tsika sa PangMasa nga kauban ni Keanna sa usa ka presscon niadtong milabay nga adlaw ang iyang uyab apan nagpalayo kini sa press samtang nagkaon og spaghetti.

Wala pod gipaila-ila ni Keanna ngadto sa mga reporters ang mao niyang 25-year-old French boyfriend, nga karelasyon na niya sulod sa unom ka buwan. Computer gadget business ang panginabuhian ni Sofian ug Hongkong based kini ug kanunay nga mobisita sa nagkadaiyang mga nasud.

Usahay matud ni Keanna moadto pod sa New York si Sofian ug gidani gani siya niini, apan nausab ang hunahuna sa iyang uyab dihang iyang giingnan nga kun mokuyog siya, dili na siya mobalik sa Pilipinas.

Hinuon gidapit pod siya ni Sofian nga mobakasyon sila sa Lyons, France, ang yutang natawhan niini busa nag-french lessons na siya karon.

Regular si Keanna sa "Maging Sino Ka Man" ug sa "Aalog-Alog" sa Channel 2 ug gibutyag pod niya nga wala siyay talent fee sa campaign ad ni Mike Defensor tungod kay higala ang naulahi sa iyang manager nga si Boy Abunda.