Jericho nana-lipod ni Heart

Wala gihapon mokomento si Jericho Rosales sa taho nga mobalhin na siya ug mahimo nang Kapuso Star.

Matud niya ngadto sa PangMasa nga kon kanunay siya nga makita karon sa mga show sa GMA-7, nagpasalamat gyud siya kay nahatagan siya og chance nga mo-guest aron iyang ma-promote ang bag-o niyang album nga "Loose Feet" uban sa iyang banda nga Jeans. Adunay 14 tracks ang album nga puro original composition niya.

Samtang dili buot istoryahan ni Jericho ang kaso sa iyang igsuon nga si Jeremiah kay anaa na kini sa korte. Dugang usab niana ang isyu nga magselos ang girlfriend niya nga si Heart Evangelista maong pugngan siya niini sa pagbisita sa iyang anak.

Butyag pa ni Jericho nga dili kini tinuod tanan, gani gusto pa ni Heart nga mouban sa iyaha kung moduaw siya sa iyang anak. Mihangyo usab siya nga tungod kay bata pa kaayo ang iyang anak, gusto niya itago una kini sa mga intriga.

Kabahin usab sa isyu nga nagdedmahan sila sa iyang uyab kaniadto nga si Cindy Kurleto sa dihang nag-guest siya sa "Eat Bulaga" niaging semana, suma pa ni Jericho, dili usab kini tinuod.

Asuy pang Jericho, mitagad siya kang Cindy apan tungod sa kadaghan sa mga tawo ug sa kasaba sa studio, wala sila natagaan og chance nga magka-istorya. Ang pamahayag ni Echo gitino usab ni Cindy sa separate interview sa PangMasa.

Apan ang tinubdan sa PangMasa nga taga-EB, naniguro gyud nga wala gyud niya nakita nga nagtinagdanay ang duha bisan pa man og kuyog kini sa "Bulagaan" portion sa nahisgutang show.

Regine-Robin movie, duha ang ending

Sigurado nga mokatawa ug mohilak gyud mo niining pagbalik nila ni Robin Padilla ug Regine Velasquez kauban sila si Eddie Garcia, Pekto ug Starstruck winners nga sila si Marky Cielo ug Jackie Rice pinaagi sa pelikula nga "Till I Met You," co-production venture sa GMA Films ug Viva Films.

Tsika sa PangMasa nga SRO ang Cinema 1 ug 2 sa The Podium sa VIP invitational screening alang sa nahisgutang movie niadtong milabay'ng Biyernes. Miabot ang tanang cast, si direk Reyes ug ang big bosses sa GMA Films, GMA Network ug Viva Films, apil na ang grupo'ng Shamrock. Didto usab si former Sen. Loren Legarda nga midayeg kang Robin, Regine ug Eddie Garcia pagkahuman sa screening.

Gipahibawo ni direk Mark una pa gisugdan ang screening nga adunay duha ka ending ang pelikula. Bahala na ang mga motan-aw niini kung unsa nga ending ang gusto nila. Kung ang una ang ilang gusto, dili kini formula movie samtang ang ikaduha mao ang formula movie.

Gihatagan kini og classification nga General Patronage,pero aduna gihapon kini mga kissing scenes sa duha nga nindot og treatment, tungod kay feel good ang pelikula ug sigurado gayud nga mauyunan kini sa mga fans ni Robin nga dugay nang nagpaabot sa pelikula sa ilang idolo.

Dugang tsika sa PangMasa nga pareho nga nindot ug maayo mo-acting sila si Robin ug Regine, bisan sila si Marky ug Jackie, pasable usab sa ilang unang pelikula.